Пошкырт кундем Мишкан селаште марий йылмым келгын тунемме полилингвальный школым почыт.
Тидым 25 сентябрьыште Мишкан селаште эртаралтше Марий форумын шыже сессийже годым Башкортостан Республикысе премьер-министрын алмаштышыже Азат Бадранов увертарен.
Кызыт Башкортостаныште ныл полилингвальный школ уло. Кум школышто руш да англичан деч посна башкир йылмым, ик вере башкир олмеш татар йылмым туныктат. Мишканысе школышто руш, англичан да марий йылмыла дене келге шинчымашым пуаш тӱҥалыт.
2010 ийысе перепись почеш, Мишкан районышто илыше-влак кокла гыч 72% – марий. Чумыр республикым ончалаш гын, кызыт тыште 103 школышто 4500 наре икшыве марий йылмым шочмо йылме семын тунемеш.
