Тений М.Гафури лӱмеш Пошкырт академический драмтеатр шкенжын 100 ияш лӱмгечыжым палемда. Тидын лӱмеш тудо ятыр кундемыш гастроль дене лектын коштеш.
Тидлан Гузель Яхинан “Зулейха открывает глаза” роман-бестселлержым ойырен налын. Театрын режиссёржо Айрат Абушахмановын шындыме тыгаяк лӱман спектакльже 2019 ийыште “Золотая маска” Россий национальный театральный премийын лауреатше лийын.
Ты спектакльым Моско, Санкт-Петербург, Оренбург, Озаҥ, Иркутск, Ульяновск да моло олаште ончыктымо. Чыла вере калык шокшын вашлийын.
Постановкын сюжетше тыгай: 1930-шо ий. Теле. Кресаньык вате Зулейха моло еҥ-влак дене пырля вагон-теплушко дене Сибирьыш каторгыш кудалеш. Ангара эҥер воктене тудлан моло калык-влакын ӱдыр-эргышт дене пырля шуко нелылыкым ужаш логалеш.
Спектакль Йошкар-Олаште М.Шкетан лӱмеш Марий национальный театрыште 2 апрельыште лиеш. 18.30 шагатлан тӱҥалеш. Спектакль пошкырт йылме ден кая. Рушлашке синхронно кусаралтеш.
Фотом Интернет гыч налме.