Пошкудо-влак шургат гын, мом ыштыман? Кушко вуйым шийман?
Т.Волкова.
Медведево район.
Роспотребнадзорын Марий Эл Республикысе управленийже умылтара:
– Уто йӱк-йӱан еҥ-влаклан мешая. Но чылаж годымак огыл Роспотребнадзорыш шижтарыман.
Йыгыре илыме, еҥ-влакын шкем шот дене кучымо, кугу йӱкан иктаж пашам ыштыме, тыгак еҥ-влакын ласкалыкыштлан мешайыше моло сомылым шуктымо годым (тыгак йӱдымат) правилым шуктымым элгӧргӧ паша орган эскера.
Пӧртыштӧ, кудывечыште да уремыште 22 шагат гыч 6 шагат марте йӱк-йӱаным чот лукман огыл. Тыгай годым шижтарымашым пуат але административный штрафым тӱлаш перна: тыглай еҥ-влаклан – 1000 теҥгем, должностной лицалан – 2000 теҥгем, юридический лицалан – 20000- 30000 теҥгем.
Тений индеш тылзыште еҥ-влак уто йӱк-йӱанлан кӧра 55 вуйшиймашым возеныт, но 15-ше гына пеҥгыдемдалтын. Тыге должностной лицалан РФ КоАП-н 6.4 статьяж почеш 1000 теҥге штрафым пуымо, а юридический лицалан йӱк-йӱаным кораҥдаш кӱштымӧ. Тыгак объектым вуйлатыше-влаклан 14 шижтарымашым лукмо. Моло министерстве ден ведомствылан 20 обращенийым колтымо.