Пошкудо ялысе Толик дене луымшо классыште тунеммем годым келшаш тӱҥалынна. Тудо олаште слесарьлан тунемын. Ончычшо ялышке кажне канышлан кудалыштын, варажым шуэнрак да шуэнрак… Тидым тудо студент-влакым тунеммаште чот «грузитлаш» тӱҥалмышт дене умылтарен. «Ит тургыжлане, вашке ужына» смс-серышым телефонышкем колтен.
Мый Толиклан сюрпризым ышташ шонен пыштенам да каникуллан авамын акаж деке унала кайыме амал дене Йошкар-Олашке автобус дене кудалынам. Авамын акаже – Галя. Тудын деке автовокзал гыч троллейбус дене кудалман. Троллейбус дене кудалмем годым окна гыч Толик ден ошалге ӱпан ӱдырын, кидым кучен, ошкылмыштым ужынам. Тунамже тудын молан ялыш толаш жапше укетым умыленам.
Галя акам деке миен шумым йӧршеш ом шарне. Тӱҥжӧ – миен шуынам. Тудлан чоныштем мо ышталтмым чыла ойленам. «Кум кече ойгырет да мондет» – мане тудо мыланем. Ойлымыжо ыш шукталт. Варажым шинчавӱдемат кодын огыл ыле. Шинчаончалтышем туврашым кӱтен, пылышыштем пырдыжысе шагатын коштмыжо йоҥген, ушыштем Толикын ош ӱпан ӱдыр дене, кидым кучен, ошкылмыжо пӧрдын. Тыге олаш толмемын нылымше кечыже марте… Умбакыжат тыгаяк сӱрет лийшаш ыле дыр, Галя акам деке толшо еҥын омсаш чытамсырын звонитлымыже тудым кӱрльӧ. Тушто пошкудо пачерысе рвезе Алексей улмаш, олаш толмем годым чӱчкыдын пырля модынна. Галя акам дене тудын аваже мемнам карусельыш, зоопаркыш, паркыш кондыштареныт.
– Салам! Олаш толмет нерген пален налынам. Тыйым ужаш манын, унала пурен ончышаш шоналтенам, – шоктен омса вес велне. – Чайым йӱашат от ӱж мо? – йодо тудо. Уна ончылно шкемын волышо кумылем ончыкташ огыл манын, Алексейлан ончыко эрташ темленам. Тыге ме коктын чайым йӱынна, тӱрлӧ нерген кутыркаленна. Тылеч вара тудо мыланем олашке лекташ темлен. Алексей ден Какшан эҥер воктене, рӱдӧ паркыште коштынна. Нойымеке, кафешке кофем йӱаш пуренна. Тушто мый Толик дене саде ошалге ӱпан ӱдырын ӱстел коклаште ласкан кутырен шинчымыштым ужынам. Толик дене шинчаончалтышна дене вашлиймеке, тудын шинчаштыже ӧрмалгымашым шижынам, койышыж гычат тургыжланымыже койо. Мыйын гын ны чоныштем, ны шинчаштем нимогай шижмаш озаланен огыл. Алексей дене икмыняр татым пырля эртарыме, тудын дене тӱрлӧ нерген чоным почын кутырмо, келшыме рвезем дечын йӧршын йӱкшыктарен.
Тылеч вара Толик почешем ятыр жап куржталын. Мый тудлан ӱдыр шӱм дене модмыжлан ушыжым сайынак пуртенам. Алексей дене тачат сай йолташ улына. Йӧн лийме годым вашлийын, тӱрло нерген мутланена.
Анфиса.П.
У Торъял район.