Волжский районысо Купсола селасе Юмын Аван Леведмыже лӱмеш черке кокымшо гана гуманитар полышым поген, Ростов областьыш колтен.
Икмыняр арня жапыште черкыш коштшо да Волжский районышто илыше-влак кочкыш сатум, тӱрлӧ кӱлешан арверым, быт химийым да медикамент-влакым поген ситареныт.
Порылыкым ончыктышо акцийыш туныктымо тӧнеж-влакат ушненыт: Сотнур кыдалаш школ да 3-шо №-ан «Пеледыш» йочасад.
Сотнур школын тунемшыже-влак медикамент-влакым ятыр чумыреныт: бинтым, марльым, йодым, зелёнкым, лейкопластырьым да молымат. Тидлан чылажге 25 тӱжем теҥге окса каен. Тыгак йоча-влак военный-влакын кумылыштым нӧлталаш манын, нунылан серышым возеныт.
Кызытсе колтымо посылке ончычсо деч ойыртемалтеш. Тышке пӧръеҥ да йоча вургем ешаралтын: носки, майке, футболко, йымал йолаш-влак ден кок мужыр йолчием. Тиде Приволжский посёлкыште илыше-влакат ӧрдыжеш кодын огытыл.
Полыш кидым Озаҥ епархийын Закамский благочинийын социал пӧлкажат пуэн.
«Клинок» КВПК-н кадетышт, СКВРиЗ-ын казакышт да Калык фронтын Республикысе пӧлкаже чыла сатум коробкаш опташ полшеныт.
11 апрельыште 5 шагат эрдене Купсола селасе Юмын Аван Леведмыже лӱман черкын настоятельже протоиерей Евгений Усков казак-влак дене пырля гуманитар полышым Ростов областьыш ужатен наҥгаен.
