Марий Элысе «Молодёжка ОНФ» команде #МыВместе акцийлан келыштарыме порылыкым ончыктымо пашам умбакыже виктара.
Командын активистше-влак «Тележка добра» акцийыш ушненыт. Нуно шкет илыше илалше еҥ, тыгак шуко шочшан еш-влаклан эн кӱлешан сатум намиен пуат.
– Кызытсе пандемий жапыште тиде акцийын кӱлешлыкше путырак шижалтеш. Поро кумылан еҥ-влак кевытлаште вераҥдыме «порылык тележкылашке» шке кумылын иктаж сатум налын пыштат. Нине сату гыч ме продуктовый наборым чумырена да полышым йодын возышо еҥ-влаклан намиен пуэна, – манеш А.Будич.
«Тележка добра» акцийыш кумылан кажне еҥ ушнен кертеш. Тидлан «Лента» да «Йола» кевытлаште лӱмын вераҥдыме тележкылаш иктаж-могай сатум налын пыштыман.
Ирина АЛЕКСАНДРОВА.