Киров кундем Арбаж посёлкышто шочын-кушшо А.Вылегжанина – МарГУ-н студенткыже. Школышто тунеммыж годымак тудо волонтёр лийын, тӱрлӧ мероприятийыш ушнен. Университетыштат тиде сомылым шуктымым чарнен огыл. Ӱдыр – чолга студентке, порылыкым ончыктышо мероприятий-влакын участникше, Молодёжка ОНФ-ын Марий Элысе командыжын еҥже.
Школ гыч тӱҥалын
А.Вылегжанина шке посёлкысо школым тунем пытарен. Изиж годым кӧ гына лияш шонен огыл: археолог, ветеринар, журналист, воспитатель. Эн чот руш литератур урокым йӧратен. Шке посёлкышто да школышто эртаралтше мероприятийлаш кумылын ушнен.
– 14 ияш гыч сценыште выступатлаш тӱҥалынам, волонтёр пашам шуктенам, кугурак класслаште волейболыш коштынам, йога дене заниматленам. Мӧҥгыштӧ яра шинчен омыл. Йолташем-влак дене пырля илалше-влаклан полшенна, Кугу Отечественный сарын ветеранже-влаклан шке полшенна. Йӱштӧ кугыза да Лумӱдыр костюмым чиен, инвалид йоча да начарын илыше еш-влакым саламленна. 9 Майым пайремлыме годым тулото ӱмбалне пучымышым шолтенна, Ӱярнялан мелнам кӱэштын, калыкым сийленна, 1 июньышто, Йоча-влакым аралыме кечын, тӱрлӧ модмашым эртаренна, пӧрт леведыш гыч лумым кышкенна, пум артанаш оптенна – чылажым каласенат пытараш ок лий. Тиде мыланем поро айдеме семын кушкаш, чаманыше лияш полшен, – ойла ӱдыр.
Йошкар-Ола келшен
Школ деч вара Анна МарГУ-ш тунемаш пурен. Тиде тунемме вер чыла шотыштат келшен толын: мӧҥгӧ деч тораште огыл верланен, Йошкар-Ола мотор да ару. Ӱдыр экономике факультетысе «Сервисная деятельность в бизнесе» специальностьым ойырен налын. Кызыт 4-ше курсын студенткыже.
– Икымше курс гычак тӱрлӧ мероприятийыш ушнем: «Студшошо», «Голос юности» да ятыр молат. Садлан элнан тӱрлӧ лукыштыжо палымем да йолташем-влак улыт. Сочиште эртаралтше Доброволец-влакын тӱнямбал да Озаҥыште «Наставник» форумлаште лийынам. Инвалид-влакын III кеҥежымсе спартакиадышкышт волонтёр семын миенам. Шке факультетыште студент-влакын самоуправленийым вуйлатем, тыште волонтёр сомыллан вуйын шогем. Ик жап Марий Элысе самырык-влак парламентшын еҥже лийынам. Ынде ик ий наре Молодёжка ОНФ-ын Марий Элысе командыштыже улам, – манеш Анна. – Еҥ-влаклан молан полшет манын шукын йодыт. Тиде йодышлан кузе вашешташ, ом пале. Еҥлан полыш кӱлеш, а мый тудлан полшен кертам гын, молан тидым ышташ огыл? Еҥ-влакын куанымыштым, шыргыжмыштым ужамат, мыйынат шӱм-чонем куана. Весылан полшымаш – илышемын ик тӱҥ ужашыже. Ача-авам, туныктышем тидлан шӱмаҥденыт.
Чолга ӱдырлан у еҥ-влак дене палыме лияш, илышын тӱрлӧ аланже гыч уым пален налаш келша. Ончыкылык пашавер нерген Анна пеш ок тургыжлане. Но тудо чонлан келшыше лийшаш, манеш. Тудлан тӱрлӧ пайремым, мероприятийым ямдылаш да эртараш келша. Анна лудаш, фильмым ончаш йӧрата.