Автор — Екатерина Самсонова (Татарстан кундем)
Иктаж-кунам 52-шо размеран портышкемым ужында? Татарстан кундем Агрыз район Буймо селаште илыше Александр Дмитриев 52, 42, 32 размеран, тыгак йӧршеш изи портышкем-влакымат шке йӧра.
Портышкемым йӧрымӧ йӱла йомын толеш. Калыкын йӧратыме ты йолчиемым кызыт фабрикылаште ыштат. Туге гынат Александр гай мастар еҥ-влак улыт.
А.Дмитриев Буймо селаште палыме «портышкем мастар» Григорий Дмитриевын ешыштыже шочын, кудымшо йоча лийын.
«Мый изи годсек межым «пурын» кушкынам», – воштылеш мастар. Портышкемым ышташ манын, эн ончыч межым шӱк деч (шукыж годым коршаҥге) эрыктыман. Иза-шольо-влак шагат дене ты сомылым шуктен шинченыт. А клубышто – кино… Межым изиш эрыктат да клубыш куржыт. Пӧртылмеке, адак ты сомыллан пижыт. Тыгак чытышлан тунемыныт, тиддеч посна мастар лияш неле.
Вара эрыктыме межым кыреныт. А.Дмитриев тачат ачажын межым кырыме арвержым арала. Кызыт шукыж годым электрический аппарат дене пайдалана. Но южнугам кид денат кыра.
Александрын пелашыже Эльза Александровнат межым кид дене шӱдыраш йӧрата. «Тудлан электропрялкымат пӧлекленыт. Но тудо тугак шога», – ойла марийже. «Мыланем кид дене шӱдыраш йӧнанрак», – шыргыжал вашешта ватыже.
Мастар еҥын мастерскойышкыжо пурена. Паша ӱстел, чиялташ ванне, коҥга, полкылаште радам дене оптымо портышкем калып-влак – чылажат пашалан кӱлеш. Кырыме межым рулон дене йытыран пӱтырымӧ. Межше шке шорыкын. Тыгак Александр воктенысе Пелемеш, Мадык, Байтуганово яллаш миен толеш. «Кова-влак тушто тудым вучат веле», – ойла пелашыже.
Портышкемым чиялташ манын, Кукморыш индийский чиялан лӱмын кудалыштеш. Мӧҥгыштак коҥгаште кошта. Вара когарта, тыге яклака лиеш.
Портышкемым йӧрымаш – чытышым йодшо, неле паша, манеш мастар. Шукын туддеке ты сомыллан тунемаш коштыныт. Ик тургымым чытат – ты сомыл деч шӧрлат.
А.Дмитриев иктым-весым ямдылкала, паша коклаштак мутланена.
– Ик мужырым ямдылаш мыняр кече кая? – йодам.
– Кум кечыште ышташ лиеш.
– Сай портышкем кужун чиялтеш мо?
– Теве шке шоналтыза: ачамын портышкемжылан – 70 ий, эше саяк. Вашлияш тӱҥалмына годым ачам Эльзаланат портышкемым йӧрен пуэн, ынде 30 ий чиен коштеш.
Пашам ыштыме годым А.Дмитриев чылажымат шотыш налеш: кӧн йолышто лужо лектын шога, ала-кӧлан шулыш лопкарак кӱлеш. Колызо-влак кугу, 52 размеран, портышкемым йодыт.
– Но ом йӧрате, кунам акым вигак йодыт, эсогыл тидлан сырем. Вара пашамат огеш ушно, – ойла Александр Григорьевич. – Мый вет оксалан кӧра огыл, а кумыл йодмо почеш ыштем, пашашкем уло чонемым пыштем.
Очыни, садланак А.Дмитриевын пашаже пытыдыме. Ты айдемылан пашажын чонлан куаным кондымыжо эн шерге.