Салам лийже, «Кугарня» газет редакций! «Изи тӱня, кугу тӱня» лаштыкым кажне гана куанен лудам. Шке историем нерген возен колташ мыйынат кумылем лекте.
Идалык ончыч ик пӧлеман пачернам ужалышна да кугурак пачерыш илаш куснышна. Ваштареш пачерыште илыше пошкудына – иктаж 70 ийым эрталтыше кова. Вашлиймеке, тудо порын шыргыжеш, эре саламлалтеш. Ик ганат ок туманле, нигӧм ок вурсо. Пошкудо-влакым шке кӱэштме когыльо, моло кочкыш дене чӱчкыдын сийла. «Икшывем-влак тораште илат, кочкаш шолташ йӧратем», – манеш кова. Пошкудо-влак тыгай костенечым уло кумылын тамлат да шоҥго ковалан шке полышыштым темлат. Но кова кажне гана «Мыланем нимо ок кӱл» манеш. Могай сай айдеме манын шоналташ лиеш тыгай годым.
Но пытартыш жапыште теве мом шекланаш тӱҥалынам.
Саде кова омсаш тӱкалта, почат – ваштарешет кочкыш дене шога. Шкеже нойышо, ӱнардыме гай коеш. «Пурыза» манам, а тудо ок пуро. Кок минут наре кутырен шогымеке, вуй коршташ тӱҥалеш, вий йомеш. А ковам ончет – чурийже чевер, шкежат веселаҥеш. Мый гына тыге ом шоно улмаш. Пошкудем-влаклан тидын нерген ойленам, нунат тыгайым шекланеныт. Мемнан подъездыш вашкеполыш машинам чӱчкыдын ӱжыкташ тӱҥалыныт. Иктын температуржо кӱзен, весын вуйжо пӧрдеш, ӱнарже уке, пуйто вий-куатым ала-кӧ шолыштеш.
Молан тыге лиймым умылаш шонен, шоҥго пошкудем эскераш тӱҥальым. Тудо южо пошкудо дек пачерышкыже пура, а мемнан деке гын ик ганат ок тол. Еҥ-влак деке уналыкеш эркын гына ошкылеш, а мӧҥгеш толмыж годым пуйто куржеш.
Илаш пурымына годым омса ӱмбалан авам изи юмоҥам сакен ыле. Тергаш шонен, ик кечын тудым кораҥдышым. Тудо кечынак пошкудо кова омсаш тӱкалтыш. «Голубцы дене сийлынем, пураш лиеш?» – йодо да прихожийыш пурен шогале. Но мый костенечым шым нал. Таче авам дек ялыш каена, коден каем гын, кочкышда локтылалтеш манын вашештышым. Тыге ойлымылан шоҥго кува сырыш да тошкалтыш дене ӱлыл пачашыш эркын волыш.
Вес кечын ӱлнӧ илыше пошкудым вашлийым да кузерак илыштат манын йодым. Кован толын кайымыж деч вара тудат вийдымылыкым шижаш тӱҥалын, шоҥго пошкудынан ала-мом моштымыжым шекланен. Тудо ок тол – чыла сай, а толын кайымыж деч вара кап гыч уло вий-куатым пуйто шупшын лукмо.
Энергийым шолыштшо еҥ-влак улыт манын, ончычат колынам. Ала мемнан пошкудынат тыгаяк?
О.Васильева. Звенигово.
Интернет гыч налме фото.