Йошкар-Оласе «Сердце матери» волонтёр толкын Украиныште СВО-што улшо-влаклан кокымшо ий полша.
Гуманитарный грузым кажне тылзын тӱрлӧ верыш колтат. Салтакна-влак тушто илен лектышт, таза пӧртылышт да тушманым сеҥышт манын, чот тыршат.
Ӱмаште мобилизацийым увертарымеке, Йошкар-Олаште илыше акак-шӱжарак, пенсийыште улшо Тамара Авгученко ден Людмила Краюшкина, «Сердце матери» волонтёр толкыным чумыреныт. Украиныште лишыл еҥышт, родо-тукымышт уке гынат, неле пагытым чон коржын вашлийыныт, кузе-гынат полшашак шоненыт.
Ик жап рӱдоласе Эшпай уремыште верланыше ик зданий пелен чумыргеныт. Полышым пуаш шонышо-влакат нунын деке эркын-эркын ушнаш тӱҥалыныт. Тидын шотышто поснак пенсионер-влак чолга лийыныт. Пенсийышт гыч мыняр-гынат ужашыжым салтак-влаклан ойыраш тыршеныт, эн кӱлешан арвер-влакым конден пуэныт. Йошкар-Оласе Успенский соборын еҥже-влакат окса дене сайын полшеныт.
Тыгай поро пашам шуктымым салтак, мобилизоватлыме-влак аклат. Начар тазалыклан кӧра ӱмаште Ульяновск гыч мӧҥгеш пӧртылшӧ ик рвезе нунылан у верыш куснаш полшен. Кызыт «Сердце матери» волонтёр толкынын еҥже-влак Эшкинин уремысе 10 б №-ан пӧртын кокымшо пачашыштыже пашам ыштат. Салтак-влакын йодмыштым шотыш налын, кӱлешан арверым (кочкышым, оптике арверым, инструментым, сварке аппаратым, тӱрлӧ маслым, газ баллоным, плёнко рулоным, эмым да молымат) Украиныш колтат. Нунылан тыгак Звенигово, Килемар, Юрино районла гыч полшат.
– Телеграм-каналыште улшо чатышкына 520 еҥ ушнен. Тиде мыланна полшаш шонышо, оксам колтен шогышо, мобилизоватлыме-влакын родо-тукымышт да молат улыт. Но ты толкынышто 15 еҥ гына пашам талын ышта. Нуно черет дене дежуритлат, еҥ-влакын кондымо посылкыштым, арверыштым погат да моло сомылым шуктат.
Мутат уке, ме погена, пашам ыштена. Но Йошкар-Олаште, тыгак республикыште илыше еҥ-влак пытартыш жапыште шагалрак полшаш тӱҥалыныт. Кова-влак шукын садыш каеныт. А заказ ешаралтеш, тыгодым сатун акышт чот шергештын. У арверым, техникым налаш манын, мыланна шуко жап вучыман.
Ме марий калыкым фронтлан, СВО-што улшо-влаклан полшаш ӱжына. Оксадам ида чамане! Тушто ситуаций ынже нелем манын, тыште тыршышаш улына. Калыкнам арален кодыман. Украиныште улшо-влакын ончыкылыкышт мемнан деч шога. Мобилизоватлыме-влак дене кылна уло. Кажне кок арня гыч нуно мо кӱлешым мыланна возат. Пытартыш гана майыште гуманитарный грузым колтышна. 20 июньышто вес грузым ямдылена. Тачылан ме улыжат 12 тӱжем теҥгем гына погенна. Тиде моткоч шагал. А йодмышт почеш миллион теҥге утлаш техникым, арверым налын колтыман, – мане Т.Авгученко.
Лекше нелылык организатор-влакым тургыжландара. Кажне еҥ полышым пуа гын, паша сайын кая ыле. Тыгодым салтак-влакат тушто тунар огыт орлане ыле. Тӱшкаште – кугу вий, маныт. Сандене поро пашаш чыланат ушныман!