Кодшо ийын да тений Марий Элыште икмыняр техникум ден колледж Украиныште специальный военный операцийыште улшо-влаклан шокшо вургемым колтеныт.
Тыгай пашам «Мы рядом» Российысе акций почеш шуктымо. Тушко Йошкар-Оласе технологический колледж, Йошкар-Оласе сервисный технологий, строительно-промышленный да Волжск оласе индустриально-технологический техникум-влак ушненыт.
Йошкар-Оласе технологический колледжыште тыгай пашам куштылго промышленность факультетыште 3-шо курсышто тунемше 12 студент да икмыняр туныктышо шуктеныт. Толстовкын могай лийшашыжым шотыш налын, педагог-влак посна технологийым ямдыленыт. Икымше тӱшкам, 28 толстовкым, 2022 ий ноябрьыште ургымо. У ий деч вара кокымшо партийлан пижыныт. Чумыр 92 толстовко ургалтын да Украинышке шкенан салтак-влаклан колталтын. Кызытеш тыгай пашам чарныме.
Толстовкым ургымо шотышто колледжын опытан туныктышыжо Галина Ивановна Васютина вуйын шоген.
– Ты пашаш ушнаш кӱлмӧ нерген колледж вуйлатыше ойлен. Чылажат Марий Элысе Образований да науко министерствын пеҥгыдемдымыж почеш ышталтын. Мом ямдылаш лийме шотышто мыланна икмыняр темлымашым пуэныт ыле. А ме толстовкым ургаш шонен пыштенна. Йошкар-Оласе икмыняр предприятий мыланна куэм, молний ден шӱртӧ-влакым пуэн.
Але марте тынар шуко триктож вургемым урген огынал, сандене изиш нелырак вашлиялтын. Паша шуко логалын. Кӱчык жапыште моткоч писын да сайын ургаш кӱлын. Мыланна тидлан промышленный тӱрлышӧ машинам налын пуэныт.
Паша шукылан кӧра тунемме процессым шелме да производственный практике дене ушымо. Студент-влак бригаде дене пашам ыштеныт, кажныжын шке ыштышаш сомылжо лийын. Южо машине деч кораҥын огыл гын, весе эре булавке дене шогылтын. Чыланат чот тыршеныт. Тыгодым специальный военный операцийыште улшо йолташыштым, изаштым, ачаштым шарналтеныт.
Мыланна Йошкар-Оласе сервисный технологий техникум кугун полшен. Ты сомылым туныктышо Татьяна Леухина виктарен. Нунын дене пырля ик команде семын пашам ыштенна. Тусо студент-влак куэмым кӱлеш семын пӱчкеден пуэныт.
Тачат Украиныште сӱрет пеш вашталтын огыл. Сандене уэш ургаш тӱҥалаш ямде улына.
Салтак-влак верч колянена, нунылан полшаш тыршена. Россий шке интересшым, чекшым, тыгак граждан-влакшым аралышаш. Ончыкыжым тӱняште тыныс лиеш манын, моткоч ӱшанена, – мане Галина Васютина.
Ты колледжыште кумшо курсышто тунемше Анна Путина ден Милена Тимина толстовкым чолган ургеныт. Анна Йошкар-Олаште шочын-кушкын гын, Милена Морко район Унчо села гыч тунемаш толын.
– Тыште технолог-конструкторлан тунемам. Толстовкым ургымаште мыланна туныктышо Татьяна Ивановна Васютина полышкален. Ик арняште 50 толстовкым ургенна. Варажым паша лектышым ончен куаненна. Украиныште СВО-што группына гыч южо студентын лишыл еҥже, ачаже, изаже кредалыт, – ойла Анна Путина.
– Кодшо ийын августышто тукым изам специальный военный операцийыш шке кумылын каен. Нелын сусыргымо деч вара эмлымверыш логалын. Декабрьыште тудым мӧҥгӧ колтеныт. Сандене толстовкым ургымем годым тудын нерген шоненам, эсогыл тыланда шокшо вургемым ургена манын, серышымат возен колтенам ыле.
Ургаш неле огыл ыле. Салтак-влаклан шокшо лийже манын тыршенна. Вет ме нунын дене кугешнена да тушеч чыланат илыше пӧрылышт манын вучена, – каласкала Милена Тимина.
Поро пашам шуктышо-влаклан вуйым савыман. Нуно салтак-влаклан ӱшаным йомдараш огыт пу, неле-йӧсым сеҥаш, ончыко каяш вийым ешарат. Куштылго огыл пагытыште полышым пуымаш – кӱлешан паша. Сандене тидлан рӱж пижман, вет ме шкенан салтакна-влак верч тыршышаш улына.