«Поро паша!» акций чумыр Россий мучко эртаралтын. А 5 декабрьыште Российыште Волонтёрын кечыже палемдалтын.
Порылык кумылым самырык тукымын чонышкыжо шке жапыштыже шыҥдарен шуктена гын, ончыкшым тиде икшыве поро кумылан да тыматле койыш-шоктышан кушкын шогалеш.
Мыят тунемшем-влак коклаште «Волонтёр кече» нерген увертарышым. 5 декабрь рушарня ыле. Шке семынем шонем: мыняр тунемшым поро пашалан тарватен кертам? Ала иктынат тыгай кумыл ок лек? Йоҥылыш лийынам улмаш. «Рвезе тукым» йоча ушемнан ятыр тунемшыже ты кечын шуко поро пашам шуктен. Ала-кӧжӧ ача-аважлан сурткӧргӧ пашам ышташ полшен. Южыжо озадыме пырыс ден пийым пукшеныт. Шуко икшыве «чын волонтёр» лӱмым сулен. Тидланже шке коча-ковалан да ялысе илалше-влаклан сай полышым пуэн.
Мемнан школышто тугакшат ий гыч ийыш «Поро паша!» проект илышыш шыҥдаралтеш. Кораксола ялысе илалше-влак деке чолга волонтёрна-влак лектын коштыт. А ялыштына эн поро кумылан, тыматле еш семын София Николаевна ден Александр Викторович Кирилловмытым шотлыман. Нуно мемнам эреак куанен вашлийыт. А тунемше-влак поро пашам ыштатат, кунаре йывыртат!
Ты тунемме идалыкыште «Поро паша!» проектыштӱҥалтыш классла гыч гыч икшыве-влакымат ушенна. Йочасад деч вара школ пӧрдемышке ошкылым ыштыше чукай-влак эшеат чот куанен моштат. Коча-кова-шамыч дек полшаш каяш эреак йодыт.
Лач тыге ме самырык тукымын вӱршерышкыже тыматле кумылым шыҥдарен толына да поро пашан шӧртньӧ дечат шергырак улмыжым пеҥгыдемдена.
Елена Григорьева, Морко район Шӱргыял школын вожатыйже.