5 декабрьыште тӱня мучко Доброволецын кечыже палемдалтеш.
Вес еҥлан, нимом йодде, кумылын полшышо доброволец, волонтёр-влак эре лийыныт. Писатель Аркадий Гайдарын «Тимур и его команда» повестьшым шукын лудыныт, очыни. Произведенийыште Тимур лӱман рвезе фронтыш кайыше салтак-влакын ешыштлан тӱрлӧ семын полшен. Шке пашаж дене иктаҥаш моло йочамат поро пашам ышташ кумылаҥден. Тимуровец, волонтёр, доброволец – тӱрлӧ мутым ик семын умылаш лиеш.
Волонтёр движенийлан элыштына кугу тӱткыш ойыралтеш. Марий Элнан кажне районыштыжо волонтёр-влак улыт. Тачысе номерыштына Шернур районысо добровольчество рӱдерын чолга еҥже Анастасия Бастракова дене палдарена.
Кумыл эре лийын, йӧн веле варарак лектын
Кугу Мушко ялын шочшыжо Настя Бастракова ынде ятыр ий Шернур посёлкышто ила, Ким Васин лӱмеш книгагудышто йоча пӧлкаште пашам ышта. Икшыве-шамычым тӱрлӧ жанран произведений-влакым лудаш кумылаҥда, шке пашаже, примерже дене чолга лияш туныкта. Самырык ӱдырамаш жапым яра шинчен эртараш ок йӧрате. Паша деч посна тудын мӧҥгысӧ сомылжат сита. Эшежым 2022 ийыште Настя доброволец движенийыш ушнен.
– Волонтёр лияш ончычат шоненам. Студент лийме годым интернетыште волонтёр-шамычын пашаштым эскеренам, а кузе нунын дек ушнаш, пален омыл. 19 ияш марлан лектынам, колой шочын, тидын дене волонтёр пашаш ушнаш кумылым ӧрдыжыш коденам. Книгагудыш пашаш пурымеке, эколого-краеведческий направлениян «Центр общения и добрых дел #ЗаДело» проект дене полшаш логале. А 2022 ийыште Йошкар-Оласе самырык-влаклан полатышкышт «Добровольчество аланыште игрофикаций» стажировкыш икымше гана тунемаш колтеныт. Тиддеч вара волонтёр-влаклан эртаралтше тӱрлӧ форумыш чӱчкыдын коштынам. Мутлан, 2022 да 2023 ийлаште эртаралтше республикысе «ПроДобро» баркемпыште, кум ий почела «МолодЙошка» форумышто лийынам. Самырык-влаклан эртаралтше районысо форумлашкат эреак ушнем. 2024 ийыште «МолодЙошка» кышкарыште Росмолодёжь. Гранты конкурсышто «Шернур! На старт!» проектем дене участвоватленам да 139 тӱжем теҥге грантым сеҥен налынам. Тиде ийын 18 майыште проект почеш фестивальым эртаренна. Шернур районысо самырык еш-влак да молат стадионышто погыненыт. Эстафетыште, фотоконкурсышто, тӱрлӧ мастер-классыште участвоватленыт. Фестивальым йӱлаш пуртынена да вес ийын адак тудым эртарена, – палдарыш самырык волонтёр.
Паша шуко да тӱрлӧ
А.Бастракова районысо добровольчество рӱдерын командыж дене пырля поро пашам чыла манме гаяк аланыште ончыктат. Кундемысе ик кугу мероприятият волонтёр-влакын полшымышт деч посна ок эрте.
– Добро.центры сайтыште районыштына 82 волонтёр регистрацийым эртен. Волонтёр отрядлаште 600 утла еҥ уло. Тенийысе статистикым ончалаш гын, кундемыштына эртарыме чыла мероприятийыш 2350 волонтёр ушнен.
Поро пашалан вер да жап эре лийшаш улыт. Ме, волонтёр-влак, СВО-што улшо салтак-влаклан маскироватлалтме сеткымат пидына, районна мотор лийже манын, кундемым шӱкшак дечат эрыктена, субботникышкат лектына, мероприятийымат эртарена, изи йоча-шамычымат модыктена, шоҥгыеҥ-влакланат тӱрлӧ семын полышкалена, – ойла Анастасия.
Изинек туныкта
А.Бастракова – шуко шочшан ава. Тудын 14 ияш Илья эргыже, 11 ияш Наташа ден 8 ияш Маша ӱдыржӧ-влак улыт. Аваштым ончен, икшывыже-влакат изинек поро кумылым ончыкташ тунемыт. Волонтёр авашт дене пырля нуно тений шошым Йошкар-Олаште самырык еш-влакын республикысе клубыштым почмашке толыныт. Тушто квизыште участвоватленыт да 3-шо верым сеҥен налыныт. «Рождество на Брюгге» еш пайремышкат ушненыт. «Шернур! На старт!» проект почеш фестивальым эртарыме годым икшывыже-влак участник семын мастарлыкыштым ончыктеныт, волонтёр семын модмашым, зарядкым эртараш, тӱрлӧ инвентарьым нумалаш полшеныт. Салтак-шамычлан кумылаҥдыше серышым возат, поделкым ыштат да посылкым погат. Тыгак уремым эрыктыме шотышто акцийыш кумылын ушнат. Анастасия поро пашашт дене икшывыже-влак тӱням волгалтарышт манын шона.
Волонтёр лияш – куан да чап. Пайремда дене тендам, порылыкым шарыше-влак!
Еш альбом гыч налме фото.