14 сентябрьыште Йошкар-Олаште «Маяк» движенийын суртдымо да нужна еҥ-шамычым шокшо кочкыш дене сийлыме у точкышт почылтеш.
Тидыже нунын ынде шымше лиеш. Тудо Йошкар-Оласе индешымше микрорайонысо 4-ше номеран поликлиникын пурла могырыштыжо верлана. «Маяк» кажне кечын каныш деч посна пашам ышташ тӱҥалеш. 8 сентябрьыште ты движенийлан ныл ий темын. Пытартыш ийлаште тушко школышто тунемше-влакат ушненыт. Поро пашам шуктымыж дене тудо шке йырже ятыр доброволец, полшаш кумылан еҥ-шамычым чумырен.