Арамлан огыл калык ойла: «Унам порын вашлият гын, кок пачаш перкеан лият». Ты калыкмут тачысе саманланат моткоч чот келшен толеш. Тӱвыра аланышке шукерте огыл «Концерт ден вашла коштына» проектым шыҥдаренна. Тушко тачысе кечылан Морко кундем Кораксола да Усурт Вараҥыж (Токпердино) тӱвыра пӧрт уло кумылын ушнен. Кораксола тӱвыра пӧртын «Муро кумыл» ансамбльже «Шочмо мланде – чон шепка» концерт программе дене Чодраялыш, Усурт Вараҥыжыш, Унчыш, Шеҥшыш да Шлань кундемлашке миен коштын.
Калык мемнам пеш порын вашлийын. Таклан огыл эше кугезына-влакак Унчо велын юзо шӱлышан улмыжым палемдат. Чынак, миен-коштынна да кӱшнӧ каласыме кажне ялыште калык ойыртемалтшыла чучын. Тек ончыкшымат ты шӱлыш аралалтын шога.
Мый чумыр коллективем лӱм дене Чодраял, Усурт Вараҥыж, Унчо, Шеҥше да Шлань тӱвыра пӧрт пашаеҥ-влаклан, тусо кундемыште илыше, мемнан концертнам ончаш погынышо кажне еҥлан уло чонем гычын лекше таум каласем.
А шукерте огыл Усурт Вараҥыж тӱвыра пӧртын чолга артистышт мемнан Кораксола ялыште пеш чапле концертым ончыктышт. Калыкнат лыҥак погынен ыле. Эре тыге пеҥгыде кылым вашла кучаш тӱҥалына гын, паша лектышнат тӱвыргӧ лиеш.
Тек ончышо калыкын кумылжо нӧлтын шога. Ынде Кораксола тӱвыра пӧрт пеленысе «Муро кумыл» ансамбльна Шале ден Осипсола велыш каяшлан ямдылалтеш.
Елена Григорьева, Кораксола тӱвыра пӧрт вуйлатыше.
Снимкыште: «Муро кумыл» ансамбль Унчышто, Шеҥшыште. Усурт Вараҥыж кундемын артистышт-влак Кораксола тӱвыра пӧртыштӧ.