Еҥлан полыш кидым шуялташ шонышо 14-35 ияш кажне самырык еҥым «Маяк» ушемыште вучат. Лачак кугу кумылда веле лийже.
Кызыт ушемыште ссузышто да вузышто тунемше, тыгак пашам ыштыше еҥ-влак улыт. «Маяк» еҥ-влакын илыш корныштым волгалтара, тыгак шӱм-чонеш порылыкым шава.
Дарья Фёдорова, «Особенные друзья» тӱшкан волонтёржо:
– Мый Йошкар-Оласе медицине колледжыште кумшо курсышто тунемам. «Маяк» молодёжный толкынын еҥ-влаклан полшымыж нерген колмеке, мыят тышке ушнаш кӱлеш шоналтышым. Ме ӱдыр-влак дене арнялан кок гана йоча-шамыч деке коштына. Пырля тӱрлӧ модыш дене модына. Тидыже вуйушыштым пудыраташ, шарнен кодаш, кидпарняштым лывырташ, тӱням пален налаш полша. Вашлиймаш деч вара шӱм-чонлан куанле, йоча-шамыч весела да лишыл улыт. Тыгак арня мучко ме йоча-влаклан поделке-влакым ыштылына, сценкым, ойлымашым, у модышым ямдылена. Тидыже волонтёр-влак коклаште икте-весым пален налаш да командыште пашам ыштен моштымо мастарлыклан туныкта. Тиде толкынын ужашыже улмемлан куанем. Ме пырля шуко ум пален налына да ятыр йочалан полшена, шонем.
«Маяк» молодёжный толкын нерген «Кугарня» газетын лишыл номерыштыже лудса.
Лекше йодыш-влаклан вашмутым +7 (964) 864-55-74 номеран телефон дене налын кертыда. Тыгак «Маяк» толкынын соцсетьлаште шке лаштыкышт уло: Вконтакте – vk.com/yolamayak да Инстаграмыште –@yola_mayak. Вашкыза поро пашам ышташ!