Кеч-могай пашаште полышкалыше-влак деч посна неле. Поснак кугу мероприятийым эртарыме годым. Вет кӧлан-гынат унам вашлийман, верым ончыктыман, лекше йодыш-влаклан вашмутым пуыман. Тыгай годым шке кумылын поро пашам ышташ шонышо ӱдыр-рвезе-влаклан, вес семынже волонтёр-влаклан, эҥертыде огеш лий.
Марий калыкын XI погыныштат ӱдыр-рвезе-влак уло кумылын волонтёр пашашке ушненыт. Нуно кум кече жапыште уна-влакым вашлийыныт, унагудылашке, кочмыверлашке ужатеныт, олам ончыктеныт, мероприятий тӱҥалме деч ончыч еҥ-влакын кап-кыл температурыштым висеныт. Икманаш, чынжымак, сай да кӱлешан пашам ыштеныт. Марий тувырым чиен шогалмышт, порын шыргыжалмышт пайремым эшеат утларак сылнештарен.
Ксения Никифорова, МарГУ, 2-шо курс:
– Мый Морко район, Нурӱмбал ялыште шочынам, марий йылме да литературым, тӱҥалтыш класслам туныктышо лияш ямдылалтам. Волонтёр пашашке икымше курсыштак ушненам. Кокымшо курсыш куснымеке, мыйым студактивышке налыныт да «Арт-волонтёрство» толкынышто ответственныйлан шогалтеныт. Ынде кажне мероприятийышке шке кумылын поро пашам ышташ шонышо ӱдыр-рвезе-влакым погем. Волонтёр лияш моткоч келша. Ме поро пашам ыштена, палыме еҥ-влак коклаште лийына, театрыш коштына. Тиде моткочак оҥай. Шукерте гына огыл «Библиотекарь года» мероприятийыште полышкалыме. 
Юрий Минюков, МарГУ, 3-шо курс:
– Мый Курыкмарий район, Олыктӱр ял гыч улам. «Марий да англичан йылме-влак» специальность дене тунемам. Волонтёр пашашке кум-ныл кече ончыч гына ушненам. Университетыште ИНКиМК факультетыштына волонтёрствылан вуйын шогышо еҥ уло. Лач тудак мыйым ӱжын. Мый келшышым. Тыгай погын ныл ийлан ик гана эртаралтеш, сандене тушто лийынам манын кугешнен кертам. Тиде кечылаште марий улмемлан куанымаш чонем утыррак авалтен. Шуко палыме да пагалыме еҥым ужмеке, шкаланем иктешлымашым ыштенам: изи ял гыч улат гынат, нунын семынак «кугу» айдеме лийын кертат.