Пондашан ӱдырамаш илен

????????????????????????????????????

Пондашсола Шернур – Йошкар-Ола кугорно ӱмбалне Тумьюмучаш ял пелен верланен. Ожно тыште пондашан ӱдырамаш илен. Кӱтӱчӧ лийынат, пеленже эре солам кондыштарен. Пуйто тыге ял лӱм шочын.

Ял кугу огыл. Кугорно гыч пурен, корем могырыш тыглай урем ӱлыкыла кая. Урем кок могырыштат пӧрт-влак пелен арама-влак кушкыт. Коремыште ик велне шокшылан кӧра пӱя пелед ужарген. Вес могырымжо, ваштарешыже, леваш палдырна. Кӧргыштыжӧ йыргешке бетон оҥго-влакым оптымо. Тиде – ялын памашыже. Ял калык тышке шуэн коштеш, шукыштын шке скважинышт уло. Икмыняр вере шукертак чоҥаш тӱҥалме пӧрт ората-влак койыт. Озашт ынде уке лийыныт, сандене нуно яллан шӱлыкан тӱсым пуртат.

Корем воктенысе ик пӧрт ончылно кодшо курымысо 70-ше ийлаште яллаштат, олалаштат вашлиялтше «Запорожец» машина але у семын койын шога. Тыште Кужэҥер районысо тӱвыра пӧлкан ончычсо пашаеҥже Татьяна да пелашыже Юрий илат. Комелинмыт сулен налме канышыште улыт. Сурт-печыштым нуно пеш арун кучат. Пакчаштыштат, пӧрт йырат шӱкшудо ок кой. А «Запорожец» машинам изи уныкаштлан модыш семын веле огыл, изинекак техникылан шӱмаҥже манын налыныт.

Комелинмыт ваштареш Зоя Ивановна ден Евгений Васильевич Липинмыт илат. Александр эргышт ден Лариса ӱдырышт, ешым поген, ӧрдыжыштӧ илат. Кеҥежым нунын деке Максим ден Данил уныкашт толыт. Кочашт нунылан модашышт изи пӧртым ыштен пуэн.

Ялыште ожнысекак рушат, марият иленыт. Кызытат тиде 9 пӧртан Пондашсола ялыште тыгакак. Но руш-влакше утларакшым ялыште суртым даче семынрак кучат – кеҥежым веле т ышке илаш толыт.

Тиде ялыште Звенигово ола администрацийын ончычсо вуйлатышыже М.Л.Жеребцов, «Россия» колхозын ончычсо председательже В.И.Королёв шочын-кушкыныт.

Иван Речкин.