Помидор росоталан тӱрлӧ ӱяҥдышым ешарыман. Тидыжым росотан кузе кушмыжым ончен ыштыман.
- Росота лывыжгаш тӱҥалын, лышташлаже ошалге-ужарге гын, азот ок сите.
- Лышташ шемалге-канде тӱсан лийын да пӱтырналтеш гын, фосфор дене ӱяҥдыман. Тыгай ӱяҥдыш утыждене шуко гын, лышташ нарынчалга да йога.
- Калий ок сите гын, помидор лышташ тӱр пуйто когарген кошка да пӱтырналтеш.
- Вӱргене (медь) ок сите годым помидор лышташ ужарге-канде тӱсым налеш.
- Росотан йымал лышташлаште кӱрен тамга-влак лектедыме магний ситыдымаш нерген шижтара.
- Росота вуй кошка да олмыштыжо тыгыде иге-влак лектедат гын, бор ок сите.
- Помидор росота пеҥгыде да кӱжгӧ кушшо манын, йодым ешарыман. 5-6 чӱчалтыш йодым 10 литр вӱд дене варыман да кок арнялан ик гана шавыман.
Ӱяҥдышым шкеат ямдылаш лиеш.
- Банан шӱмыштӧ калий, фосфор шуко. Южо еҥ росотам шындыме ате пундашыш банан шӱмым пышта але коштымо банан шӱмым тыгыдемда да шындыме рок дене вара. 2-3 банан шӱмым 3 литр вӱдыш пышташ да кум кече шинчыкташ гын, пайдале настой лиеш. Тудым, тынарак вӱд дене варен, помидор росоташ шавыман.
- Кофеште азот, калий да магний шуко. Коштымо кофе кучам росоталан ямдылыме рок дене варат.
- Муно шӱм кальцийлан, калийлан, кремнийлан да фосфорлан поян. 3-4 муно шӱмым шӱалтыза. Кум литр вӱдыш пыштыза да кум кече шинчыктыза. Тыгай вӱдым росоташ шавыза. Утларак пайдам налаш манын, коштымо муно шӱмым кофемолкышто тыгыдемдыман да, ик литр шолшо вӱдым ешарен, 4-6 сутка шинчыктыман. Тыгай вартышым 10 литр вӱд дене варыман да помидорыш шавыман.
- Рушто бактерий-влак улыт, нунышт помидор росоталан кушкашышт да пеҥгыдемашышт полшат. Ру ӱяҥдыш дене кок тылзе марте росотам ӱяҥдат. 5 г рум 5 литр вӱдыш ешарыза да ик сутка шинчыктыза.
freepik сайт гыч налме фото.