Кок арня жапыште Марий Элыште коронавирус инфекций дене черланыше-влак шукемыныт. Тидын нерген Оперативный штабын заседанийыштыже тазалык аралтыш министр М.Панькова каласен.
Тӱҥ амалже – черле-влак эмлымверыш вараш толыт. Кызыт республикыште коронавирус инфекий дене черланыше-влаклан 10 медорганизацийыште 1494 вер уло. Тушто 918 еҥ эмлалтеш. Кокла шот дене кечеш 40-50 пациентым госпитализироватлат.
Республикысе тазалык аралтыш министерствыште палдарат: Марий Элыш ты чер ваштареш 2292 дозо вакцине толын. Пытартыш данный почеш 900 наре еҥ прививкым шындыктен. Вакцинацийым республикысе 19 медорганизацийыште ыштат.