Кызытсе илыш айдеме деч кугу вий-куатым, чытышым йодеш. Утыждене пуштыланымаш, стресс наркотикым, аракам да моло психоактивный веществам тамлен ончаш таратат, тыге зависимость шочеш – алкоголизм, наркоманий, токсикоманий.
Тыглай еҥлан чучын кертеш, пуйто арака, наркотик дене таҥлалтмаш лушкыдо койышан улмым, удан воспитатлымым ончыктат. Тиде йоҥылыш шонымаш. Чыла тидын нерген Марий Эл Республикысе Тазалык аралтыш министерствын тӱҥ внештатный наркологшо Светлана Путилова каласкала.
Кызыт уло тӱнямбал медицине психоактивный вещества-влак деч зависимостьым организмын патологический состоянийжылан шотла.
Химический зависимость – тиде хронический, чот вияҥше наркологий чер, тудо колымаш марте шукта. Алкоголь ден наркотик оптышыш логалше еҥ-влак, нунын родо-тукымышт ятыр нелылыкым шижыт, тунамак мо ышталтме деч вожылыт, а шукыж годым могай лӱдыкшыш логалмыштым огыт умыло.
Кызыт тӱрлӧ «эмлызе» уло, нуно зависимость деч пуйто вашке да эрелан утлаш шке полышыштым темлат. Но нине услугылан оксам тӱлыман, да шукыж годым лицензийышт уке.
Тыгодым умылыман: арака да наркотик деч зависимостьым эмлымаш – шуко шӧрынан, пеш кужу жапым налше да неле паша. Химический зависимость дене орланыше еҥ-влаклан да нунын родо-тукымыштлан квалифицированный психиатр-нарколог-влак веле, эҥгекым ыштыде, чын медполышым пуэн кертыт.
Тыгай полышым Республикысе наркологий диспансерыште налаш лиеш, тудо кугыеҥ-влакым веле огыл, йоча-влакымат обслуживатла. Полышым анонимноат пуат. Наркодиспансер пелен диспансерно-поликлинический отделений пашам ышта, тушто медполышым амбулаторно пуат. Тыгак стационарный наркологий отделений уло, тушто пациент-влаклан психоактивный вещества дене пайдаланыме деч вара организмлан, психикылан ышталтше неле эҥгекым сеҥаш полшат.
Эше икте – стационар условийыште медицине реабилитаций отделений. Тыште лечебно-реабилитационный программе почеш пашам ыштат. Тудо пациентым психоактивный вещества деч посна илаш туныкташ виктаралтын. Программе почеш психотерапий, лекций курс, тренинг, групповой да индивидуальный занятий-влак эртаралтыт. Пациент-влак айык-йӱлам кучен илаш тунемыт да тиддеч куаным налыт.
Реабилитаций – наркотик, арака да моло психоактивный вещества деч посна эрыкан илышыш корно.
Алкоголизм да наркоманий психикым да уш-акылым локтылыт, тыге токсический энцефалопатий, деменций да слабоумий марте шуктат.
Медполышым мыняр ондакрак йодын миеда, ты нелылыкым сеҥаш тунар куштылгырак.
Республикысе наркологий диспансер:
регистратурын телефонжо – 8 (8362) 45-21-63,
медицине реабилитаций отделенийын телефонжо – 8 (8362) 57-36-21.
Марий Эл Республикысе Тазалык аралтыш министерствын материалже почеш ямдылыме.