Арня ончыч тӱтан мардежлан кӧра Марий Элыште ятыр еҥ туткарыш логалын. Республик мучко 126 ял тул деч посна кодын ыле. Кугу мардеж эн чотшо У Торъял район Токтарсола ялшотан илемыш пурышо яллам да Морко районысо Рушродо ялым тӱкен.
Рушродо ялыш регионым вуйлатыше Александр Евстифеев миен. Ты ялыште 11 пӧрт, административный зданий да шуко пачеран икмыняр пӧрт эҥгекыш логалыныт. Стихийлан кӧра, мутлан, мардеж шуко шочшан ешын пӧрт леведышыжым кӱрышт кышкен. Суртоза Михаил Кугергин А.Евстифеевлан вич икшывыже улмым да айлыме пӧртыштӧ илаш логалме нерген каласен. Регион вуйлатышын кӱштымыж почеш, леведышым вашталташ стройматериаллан оксам пӧртылтат, арня жапыште пӧртым леведыт.