Кундемыштына поро кумылан, весын ойгым умылен моштышо, полшаш ямде еҥ-влак ятырын улыт. Тидым Марий Элысе «Сердце матери» волонтёр организацийым вуйлатыше Т.А.Авгученко пример дене пеҥгыдемден ойлыш. Йошкар-Ола гыч волонтёр, чолга еҥ Любовь Филипповна Четкарева дене палымым ыштыш. Тудо февраль тӱҥалтыште спецоперацийыште улшо боец-шамычлан 100 тӱжем теҥгелан кӱлешан арверым, техникым налын пуэн.
Порылык тӱням утара, неле-йӧсым сеҥаш полша. Таче спецопераций шуко еҥым поро да суапле пашалан кумылаҥда, илыш нерген келгынрак шонаш туныкта да тӱняумылымашым вашталта. Ме палена: тиде неле жапыште боец-влак, илышыштым чаманыде, элнам йӱдшӧ-кечыже пеҥгыдын аралат.
«Сердце матери» рӱдер тӱҥалме пашажым тачат сайын виктара. Тушто боец-шамычын йодмышт почеш мо кӱлешым налашак тыршат. Тиде поро пашаш таче шуко еҥ ушна. Кӱлешан арверым, вургемым, техникым але оксам конден пуат. Поген ситарымеке, салтак-влаклан гуманитарный грузым колтат. Любовь Филипповна Четкарева поро пашаш ушнен да волонтёр лийын.
– Тудо чон йодмыж почеш мемнан деке толын, да фронтышто улшо боец-шамычлан мо дене гынат полшаш ямде улам манын. Любовь Филипповна МВД структурышто ятыр ий пашам ыштен, кызыт – сулен налме канышыште. Тудлан ме спецопераций гыч боец-влакын йодмашыштым ончыктенна. Любовь Филипповна сайын шымлен лекте да мане: «Айста, кӱлеш кевытлашке миен толына». Тыге 100 тӱжем теҥгелан Урал автомашиналан кок аккумуляторым, ныл генераторым да эше 1Тб-аш внешний дискым налын. Вот тыгай чонан айдеме!
Каласыме шуэш: салтак-влаклан кеч-могай пайдале арверым кондышо кажне кова-шамыч волонтёр-доброволец улыт. Ӱдыр, ӱдырамаш, кова-влаклан вуйым савем, – мане Т.Авгученко.
Любовь Филипповнан пашажым подвиг семынат ончыкташ лиеш. Тудо боец-влаклан шке кӱсенже гыч кугу оксам луктын пышташ нимынярат чаманен огыл. Тыге яндар шӱм-чонан, поро кумылан, кӧргӧ виян айдеме гына ыштен кертеш, шонем. Тыгай еҥ-влак деч примерым налман да шкеат тыгаяк чын айдеме, поро лийын кодаш тыршыман.