19 декабрьыште Йорло-влаклан полшымо тӱнямбал кече палемдалтеш.
Газетым лудшо йолташна-влак нужнан илыше-шамычлан полшат мо? Иктаж еҥлан полыш кӱлеш гын, кидым шуялтат але «мыйын пашам огыл» манын савырнен каят?
Екатерина Головкина, Йошкар-Ола:
– Иктаж-кӧлан полыш кӱлеш гын, эртен каен ом керт. Иктаж 10 ий ончыч ик организаций дене пырля пашам ышташ тӱҥалынам. Палымем-шамыч деч вургемым, йолчиемым поген, ты организацийын складышкыже наҥгаеденам. Вара Аван пӧртшӧ дене кылым кучаш тӱҥалынам. Тыгакак вургем ден йолчиемым поген намиен пуэм. Южгунам мастер-класс-влакым эртарем. Поро пашам чон йодмо почеш шуктем. Икшыве-влакын куан дене темше шинчаштым ужамат, шкемынат кумылем нӧлтеш. Адакшым весылан порым ыштен, тиде порылык шкаланет икмыняр пачаш пӧртылеш.
Инна Шабалина, Йошкар-Ола:
– Нужнан илыше-шамычлан огыл, иктаж-кӧлан полыш кӱлеш гын, полшашак тыршем. Йочам-шамычын изи вургемыштым ом кудалте, икмыняр сумкам погем да йочапӧртыш намиен пуэм. Интернет лаштыклаште иктаж еҥлан полшаш оксам погымо нерген уверым ужам гын, мыняр кертам, колтем. Кевыт воктене ужален шогышо кова-шамычым пеш чаманем. Нуно шукыж годым пӧлемысе кушкылым, пакчасаскам темлат. Тыгай годым ниможат оккӱл гынат, иктаж сатуштым налде эртен ом кай. Тиддене шийвундем шукылан ок катыкем, а шоҥгыеҥлан, можыч, могай-гынат шӱкалтыш лиеш.
Еш альбомла да freepik сайт гыч налме фото-влак.