Полшат, рашемдат, умылтарат

4 февральыште МОСИ-ште Ачамланде воин-влакын ешыштын комитетыштын Марий Элысе пӧлкаже икымше конференцийым эртарен.

Тушко Украиныште эртаралтше спецоперацийын участникше-влакын лишыл еҥышт да кугыжаныш кучем орган ден мер организаций-влакын еҥышт толыныт.

Марий Эл Республикысе Правительстве Председательын икымше алмаштышыже Е.П.Кузьмин, Правительстве Председательын алмаштышыже О.Ю.Бадма-Халгаева, тыгак министерстве-влакын да Кугыжаныш Погынын депутат-шамыч корпусын, военный комиссариатын еҥышт, Еҥ-влакын правашт шотышто уполномоченный представитель тӱрлӧ йодышлан вашештеныт. Мутлан, военнослужащий да нунын ешыштлан социальный полышым, кугыжаныш полышым пуымо, ветеран-влакын йӱлаштым шуктымылан полыш шотышто умылтареныт. Тышке СВО участник-влакын ача-авашт, пелашышт Йошкар-Ола гыч веле огыл, республикысе тӱрлӧ район гыч толыныт.

Конференций годым регионысо ты комитетын штабшым ойыреныт. Тушко мер организаций-влакын, волонтёр ушем, ветеран-влак организаций-шамычын еҥышт да СВО участник-влакын авашт, пелашышт пуреныт. Вашлиймаште лишыл жапыште ыштышаш мероприятийлам: специальный военный операцийыште колышо колышо салтак-влакын лӱмыштым курымаҥдымаште да адресный полышым пуаш – палемденыт.

Интернет гыч налме фото.