«Полшаш куштылго!» — тыгай ӱжмаш дене кум тылзе жапыште начар тазалыкан икшывым ончен куштышо еш-влаклан «Любящий родитель» ача-ава клуб пашам ышта.
Тиде поро паша оласе бизнес колледжыште да МОСИ-ште Президентский грант фондын да «Добрая Марий Эл» регионысо мер организацийын полшымышт дене ышталтеш.
Ача-ава да йоча-влак кажне шуматкечын погынат. Тыгак «ойртемалтше» йочан авашт-влаклан тылзеш кок гана фитнесыш кошташ йӧн пуалтеш.
Ешыште ваш умылымаш, сай кумыл да ласкалык лийже манын, проект почеш кугыеҥ-влак дене психолог Ольга Владимировна Калмыкова пашам ышта.
Шукерте огыл ача-ава-шамыч Йошкар-Олан администрацийын ола озанлык управленийын вуйлатышыже Игорь Подольский да ЖКХ пӧлкан начальникше Вячеслав Попадюк дене вашлийыныт. Ача-ава-влак начар тазалыкан еҥ-влакланат ола кумдыкым келыштараш темленыт.
Оласе бизнес колледжын волонтёржо-влак начар тазалыкан икшыве-шамычлан тӱрлӧ пайремым ямдылат. У ий пайремым оҥайын да пайдалын эртареныт. Ава-влакын тазалыкыштым пеҥгыдемдыме жапыште студент-волонтёр-влак йоча-шамыч дене модыныт, уш-акылыштым шуареныт.
