Тений Медведево район Поланур (Пуланур) ялын 300 ий темме лӱмеш кугу пайрем лиеш. Ты шотышто Марий Эл Правительствыште оргкомитетым чумырымо.
«Тиде пайрем республикыште илыше-влаклан кугу кышам кодышаш. Вет ты ялыште марий калыкын этнографийжылан негызым пыштыше Т.Е.Евсеев илен, 1905-1918 ийлаште верысе школышто туныктен. Кугу пайремым эртарыме шотышто шонымаш кузе лектын? Марий Элым вуйлатышын приёмышкыжо Поланур ялын чолга еҥже Н.Масленникова толын да ял марте корным ышташ йодын, ялысе историйым каласкален», – каласыш оргкомитетым вуйлатыше, Марий Эл Правительстве председательын икымше алмаштышыже М.З.Васютин.
Ынде чапле корным гына огыл, указательымат, шарныктыш кӱм але монументымат ыштышаш улыт.