Поланым юалге верыште орлаҥгынек кылден сакален аралаш але морозильникыш опташ лиеш.
Мӱян полан – ик эн сай витаминан эм, тудым тыге телыланат шапашлаш сай. Поланым шокшо вӱд дене когартыман да дуршлаг але шокте гоч колтыман. Поланыш тунарак мӱйым ешарыман, иктеш сайын лугыман да пӧлемыште арня шинчыктыман. Вартышым ик кугу совла дене яра пагареш кочман – тыге кечылан кӱлеш витаминым ситареда.
Логар корштымо да йӱк оралгыме годым ик стакан шокшо вӱдыш ик кугу совла поланым пыштыман, шокшын леведман да кок кече шинчыктыман. Ангине годым логарым кечеш кум гана шӱалтыман, а йӱк оралгыме годым ик кугу совла дене кечеш кум гана йӱман.
Бронхит годым кум кугу совла поланым лаштыртыман да кум кугу совла мӱй дене варыман. Вара ты вартышыш ик литр шокшо вӱдым пыштыман да лу минут шолтыман. Шӱрыман да чай семын йӱман. Тыгай чай шодо пуалме годымат пайдале.
Изи давлениян да верге черан еҥ-влаклан шекланыман.