Килемар районысо Кӹмья селаште Эн Святой Аван леведмыже лӱмеш черке уло. Тудым 1866 ийыштак чоҥымо. Но черке ны кугыжанышын, ны районын собственностьшылан огеш шотлалт, вес озат уке. Тидлан кӧра тӱвыра поянлык объект йӧршеш пытен кертеш.
Районысо прокурор Кӹмья ял шотан администрацийым вуйлатыше лӱмеш ты экшыкым кораҥдаш кӱлмӧ шотышто представленийым луктын, но тудым шуктымо огыл. Садлан Килемар районын прокуроржо Медведево районысо судыш, озадыме объектым учётыш налме шотышто мерым приниматлаш йодын, искым колтен.
Прокурорын йодмыжым шуктымо: черкым Кӹмья ял шотан администрацийыште озадыме пого семын учётыш налме.