Марий калыкын ХI погынжо вашеш ыштыме оргкомитет (тышке 25 еҥ пурен) кок заседанийым эртарен. Тушто тӱрлӧ йодышым каҥашыме. Ышталтше паша нерген Марий Эл Республикысе Правительстве председательын икымше алмаштышыже М.З.Васютин дене мутланышна.
– Михаил Зиновьевич, шушаш погын Марий Эл Республиклан 100 ий темме идалыкыште эртаралтеш. Тиддене да эше мо дене черетан погын ойыртемалтеш?
– Чынжымак, Марий калыкын погынжым кундемнан 100 ияш идалыкше лӱмеш эртаралтше программыжын тӱҥ мероприятий радамышкыже пуртымо. Шуко съездым ямдыленна. Мер толкын тиде пашам шкегыч шуктен кертын огыл гын, кугыжаныш могырым полшеныт. Тений могай ойыртем уло? Икымше гана регионым вуйлатыше республикысе оргкомитетым вуйлата. Эше 2019 ий апрельыште планым ямдылыме да пеҥгыдемдыме. Тыгодым каласыме: организационно-финансовый пашалан тӱвыра министерстве вуйын шога, а содержательный ужашым общественник-влак ыштышаш улыт.
Эше весе. Регионым вуйлатыше мер ушем-влакын вуйлатышышт дене вашлийме годым Оньыжа Эдуард Васильевич Александровын пуымо йодыш-влакым ончен лекме. Ондак погынышто делегат ден эскерыше-влак лийыныт гын, тений чылалан икгай статусым, делегатым, ышташ пеҥгыдемдыме. Вес йодышыжо делегат-влаклан рӱдоласе унагудылаште верым мумо шотышто лийын. Вет оксам аныклаш манын, нуным ондак ола деч ӧрдыжсӧ санаторийлаш илаш пуртеныт.
– Марий калык погыныш толшо делегат-влак могай унагудылаште илаш, могай кочмыверыште эр, кечывал да кас кочкышым ышташ тӱҥалыт?
–Чылаже погыныш 404 делегат толеш. Эн кугу делегаций Башкортостан гыч толшаш – 69 еҥ. Кушто мыняр мандат лийшашым Мер Каҥаш посна ончен лектын да пунчал дене пеҥгыдемден.
Унагудо ден кочмывер йодышлам 17 январьыште лийше черетан заседанийыштына ончен лектынна. Йошкар-Олаште чыла унагудышто 400 утларак вер гына уло. Но палена: чылан унагудышко илаш огыт пуро. «Амакс», «Ревизор», «Вирджиния», «Никитин» унагудылаште вер шотышто броньым кодаш тӱвыра министерствылан кӱштымӧ ыле. Ты шотышто унагудо-влакын вуйлатышышт деч гарантийный серышым налме. Сапаев лӱмеш опер да балет театрын кафеже, «Ревизор», «Меридиан» кочмыверла шотыштат кутырен келшыме. Тыгак Йошкар-Олаште тӱрлӧ верым художественно-декоративный оформитлыме шотышто паша ышталтеш.
– Делегаций-влакын толмышт шотышто нимогай чарак уке?
– Марий калык погыныш вес республикла гыч вуйлатыше-влак толаш шонат мо?
– Тендан шонымаште, Михаил Зиновьевич, Мер Каҥаш шке пашажым кузерак шуктен?
Нине йодыш-влаклан М.З.ВАСЮТИН могайрак вашмутым пуэн? «Кугарня» газетын 29 февральыште лекше номержым налын лудын кертыда.