Кодшо кугарнян Советский район Михайловка селаште «Йӧрате шке элетым, пагале шке историетым» краеведений шагатыште лийна.
Тудо селасе «Сеҥымашын салютшо» изи садыште эртаралтын да ты кундемысе Кугу Никольский школышто ондак директорлан пашам ыштыше да марий йылмым туныктышо, поэт семын палыме Николай Золотарёвлан пӧлеклалтын. Михайловка кундемыште туныктышо-поэтым да тудын аважымат, Кугу Отечественный сарын участникше Вера Митрофановнам, сайын палат. Вет Золотарёвмыт тышеч Кужэҥер районышко илаш кусненыт гынат, тиде чулым ӱдырамаш тышанак кодын.
Николай Александрович шкеже толын кертын огыл, сандене Ирина ӱдыржӧ («Кугарня» газетыште тӱҥ редакторын алмаштышыжлан ыштыше И.Н.Гурьева) тудын илышыж нерген каласкален. Ирина Николаевна ачажын марий йылмым йӧратымыже да тудым тунемше-влаклан кӱлеш семынак туныктымыжо, йоча-шамычым шахмат дене модаш кумылаҥдымыже, велопоход дене республикна мучко коштыктымыж нерген ойлен.
А книгагудо пеленысе «Мудрое поколение» клубын еҥже-влак Н.Золотарёвын «Ӱшут ӱмбалне ӱжара» (2019), «Малем ӧндалын пиалем» (2021), «Моторлык ила гын тӱняште» (2024) почеламут сборникла гыч почеламутлажым лудын пуэныт. Шочмо кундем да илыш нерген сӧралын возен моштышо мутмастарын кажне шомакыште кугу шонымашым шылтымыжым да поро пашалан ӱжмыжым ужына. Пенсийыште гынат, тачысе тургым верч чон вургыжмыжым шижына.
Варажым ондак школ столовыйышто пашам ыштыше З.А.Орехова туныктышо-поэтын аваж нерген шарналтен да Золотарёвмыт ешлан тауштен.
А И.Н.Гурьева пӧлек шотеш книгагудылан книга-влакым кучыктен да «Ачамым шарнымыланда тау» манын каласен.
Мероприятийым верысе книгагудым вуйлатыше С.В.Моторова ямдылен. Тидлан чолга энтузиаст Г.И.Мичеев кумылаҥден мане. Светлана Вячеславовна Н.Золотарёвын сборникше ден савыкталтше изданийласе материалым изирак ончерыш чумырен – тидым «Пеледам мый калык келшымаште» манын лӱмден. Чынжымак, кызыт палыме туныктышын поэзийже сылнештеш да пеледеш.
Эльвира Терентьева.
Д.Быкован фотожо-влак.