Поездыш билетым пӧртылтынем

Роспотребнадзорын Марий Эл Республикысе управленийжын пресс-службыжо умылтара:

– Поездыш билетым пӧртылтымӧ радамым Кӱртньыгорно транспорт дене пассажирым, багажым, грузобагажым шупшыктымо правилыште возымо, тудым РФ транспорт министерстве 2013 ий 19 декабрьыште посна приказ дене пеҥгыдемден.

Пассажир кудалмылан, сервисный обслуживанийлан да молылан тичмаш акым пӧртылтен кертеш:

 поездын тарванен кайымыж деч кандаш шагат ончыч билетым кассыш сдатлен шукта гын;

 пассажир-влакын тӱшкан чумырген кудалаш налме билетым перевозчиклан поезд тарваныме деч шым кече ончыч пӧртылта гын.

Билетын тичмаш акшым да плацкартын (вагон дене пайдаланымылан тӱлымаш) пел акшым, сервисный обслуживанийлан да молылан тӱлымӧ акым пӧртылташ лиеш:

 билетым кассыш поезд тарваныме деч кандаш шагат деч шагал, но кок шагат деч шагал огыл, жап кодмеке сдатлыме годым;

 пассажир-влакын тӱшкан чумырген кудалаш налме билетым перевозчиклан поезд тарваныме деч ончыч шым кече деч шагал, но кум кече деч шагал огыл, жап кодмеке сдатлыме годым.

Правилын 88-ше пунктшо дене келшышын, «невозвратный» манме тариф почеш налме билетлан окса огеш пӧртылтат. Исключений:

 пассажир але тудын дене пырля кудалшаш лишыл еҥ кенета черланен, лишыл еҥ колен але пассажир несчастный случайлан кӧра сусырген;

 ты поезд огеш кудал але кучалтеш, але билетыште ончыктымо верым пассажирлан пуымо огыл.

Йодмашым шуктыдымо годым вуйшиймашым возыман.