Марий Элым Вуйлатыше Ю.Зайцев «РЖД» ОАО филиалын Горьковский кӱртньыгорным вуйлатыше С.Дорофеевский дене вашлийын.
Нуно 2023 ийысе пашаштым иктешленыт. Тыгак ончыкыжымат кӱртньыгорно пашам пырля вияҥдыме да лӱдыкшыдымылык йодыш-влакым лончыленыт.
2023 ий март гыч «Йошкар-Ола – Озаҥ», «Озаҥ – Йошкар-Ола» поезд идалык мучко кудалыштын. Тыгак «Зелёный Дол – Яраҥ» поездым Котельнич станций марте колтымылан кӧра регион-влак коклаште «РЖД» ОАО-н грузшым ты кӱртньыгорно дене шупшыктымо шотышто проектым ямдылыме. Ты шонымашым Татарстан Республикын да Киров областьын правительствыштат сайлан шотленыт.
С.Дорофеевскийын палемдымыж почеш, ола воктенысе маршрутым идалык мучкылан шуйымо дене пассажир-влак 2022 ий дене таҥастарымаште 2023 ийыште 33 процентлан шукемыныт, а торашкырак 13 процентлан шукырак кошташ тӱҥалыныт. Ончыкыжымат пассажир да груз-влакым шупшыктымо шотышто ятыр пашам ышташ палемденыт.
Ю.Зайцев ден С.Дорофеевский Марий Элысе Правительстве ден «РЖД» ОАО коклаште 2024-2026 ийыште пырля пашам ыштыме шотышто келшымашым подписатленыт. Тыгак нуно кӱртньыгорно пашаеҥ-влакын у скверыштышт лийыныт. Тушто «РЖД» ОАО-н пӧлеклыме Л-1843 ретро- паровозшым ончалыныт. Палемдыман, ты скверым «Формирование комфортной городской среды» федеральный проект кӱшеш ыштеныт.
Д.Речкинын фотожо.