Поезд деч шеклане!

Ноябрьыште шуко школышто шыже каникул кая. Каныш жапыште йоча-влак тӱҥ шотышто шкаланышт шке оза улыт: кушко шонат, тушко каят, мом шонат – тудым ыштат. Тыгай годым ача-авалан икшывышт-влак дене мутланыман, кечыгут мом ыштымыштым, кушто коштмыштым эскерыман. Илыме вер деч тораште огыл кугорно да кӱртньыгорно улыт гын, поснак тӱткӧ лийман.

Изирак ийготан-влаклан ты тӱняште кузе да мо ышталтме оҥай. Тидын нерген палдарыше уке гын, нуно шке чыла «шымлаш» тӱҥалыт. Мутлан, рельсыш кӱм але оксам пыштымеке, умбакыже мо лийшашым пален налмышт шуэш. Йодышым рашемдаш манын, «опытым» эртарат. Но тиде тергымаш могай эҥгекым конден кертме нерген шоналтен огыт шукто. Эн ондак кугу туткар лиеш: поезд рельс гыч торла, еҥ-влак эмганат, транспорт пудырга. Тылеч посна кӱм рельсыш пыштымеке, тудо мӧҥгеш айдемылан миен пернен кертеш.

Тыгай томаша-влак ынышт лий манын, Россий МВД-н Чувашский линейный транспортный полиций пӧлкан Йошкар-Оласе отделенийжын пашаеҥже-влак тунемше да кугыеҥвлаклан вашлиймаш-влакым эртарат.

Нунылан Памар (Волжский район), Шолэҥер (Звенигово район), Сӱзлэҥер (Звенигово район) станцийлашке чӱчкыдын лекташ логалеш. Вет ты верлаште йоча-влак рельсышке кӱм оптат але вагонлашке тӱрлӧ арверым чӱчкыдын кышкат.

Шукыж годым ме Шолэҥер станцийыш коштына. Ты ялыште самырык-влаклан погынаш келыштарыме вер уке, сандене станцийыш толыт. Тушко тӱрлӧ ийготан-влак погынат, тамакым шупшыт, аракам йӱыт. А закон почеш ийготыш шудымо икшыве-шамыч тыгай осал пашам ыштышаш огытыл. Сандене нуным кучымеке, административный правонарушений кодекс почеш ача-аваштлан протоколым возена.

Вес кугу проблеме: келыштарыдыме верыште кӱртньыгорным вончымаш. Южгунам тыгай сӱретымат ужына: ача-ава-влак, йочаштым кид гыч кучен, тыгай верлаште шке вончыктарат. Вес гана йоча шкежат вик корно дене каен кертеш манын огыт шоналте. Тыгай ситуацийым ужмеке, ме законым пудыртымылан протоколым возена да штрафым тӱлыктена.

Шукерте огыл вагон йымач куржталше кум ӱдырым кученна. Адакат кугурак-влаклан мут кучаш логалеш.

Йоча-влак шогышо але кудал эртыше поезд воктене селфим ышташ йӧратат. Тыгай фотом ыштыме годым илыш дене чеверласен кертыт манын огыт шоно. Поезд шагатыште 60-80 километр писылык дене кудалеш. Чарнен шогалмешкыже, тудо эше 600- 800 метрым эртышаш. Тидым йоча-влак огыт умыло, а вашлиймаш годым нунылан чыла умылтарымеке, чот ӧрыт, – каласыш, ийготыш шудымо йоча-влак дене пашам ыштыше специалист, полиций майор Наталья Матвеева.

Кӱм оптымаш, вагонлаш тӱрлӧ арверым кышкымаш деч посна эше вес осал пашам ыштат: вагонлам граффити дене «сӧрастарат». Тиде сомыллан уголовный кодекс почеш мутым кучаш шогалтен кертыт. Видеозаписьым ончымеке, титакан-влакым кӱчык жапыште муыт.

Мутланыза йоча-влак дене, лӱдыкшыдымылык правил-влакым умылтарыза. Шкенан да йоча-влакын илышышт – мемнан кидыште.

Россий МВД-н транспортный полицийжын Чуваш пӧлкашкыже кум линейный отделений пура: Канаш станцийысе, Йошкар-Оласе да Чебоксар оласе вӱд да юж транспортысо. Тыгак линейный пункт-влак улыт: Алатырь, Ядрин, Козьмодемьянск, Звенигово олаласе вӱд портлаште; Йошкар-Ола, Чебоксар олаласе аэропортлаште да Новочебоксарысе пристаньыште.

Чуваш линейный отдел Владимир область ден Татарстан республикысе участке-влакым эскера. Тудын кужытшо – 670 километр. Ты кӱртньыгорно Угарман, Киров, Чуваший, Мордовий, Татарстан кундемла да Марий Эл Республикла гоч кая.

Йошкар-Оласе линейный отделений Россий МВД-н Чуваш ЛО-н структурышкыжо 2011 ийыште ушнен.

Йоча-влаклан поезд, кӱртньыгорно нерген пален налаш оҥай гын, кӱртньыгорно вокзалын пашаеҥже-влак дене кутырен келшен, экскурсийым эртараш йӧн уло. Тидлан ончылгоч йыҥгыртен рашемдыман. Кодшо тылзын тунемше-влак дене ик тыгай вашлиймаш лийын

Статистике почеш Россий мучко идалыкыште ныл еҥ поезд йымак логалын колен, эше кумытын нелын сусыргеныт.