Наталия Волкован школ илыш нерген возымо «Разноцветный снег» повестьше 2017 ийыште В.Крапивинын премийжым сулышо-влак коклаш логалын. Тунам тудо спецприз дене палемдалтын.
Автор 13 ияш Стася нерген воза. Тудо книгагудын у пашаеҥже Яков Семёнович дене палыме лиеш. Библиотекарь ӱдырлан литературный кружокыш ушнаш темла. Стася пеленже Рома йолташыжым шӱда. Кружокышто подростко-шамычлан икымше заданийым пуат – сарыште тушман-влаклан ужалалтше А.П.Старцевын историйжым шымлаш. Тудын кӧ улмыжо шуко еҥлан палыме, но библиотекарь ӱдыр-рвезе-шамычлан «Старцев, чынжымак, ужалалтше але уке?» йодышым рашемдаш кӱшта. Тидын дене нуным чыным кычалаш кумылаҥда. Ты заданий дене подростко-шамычын койышышт, тӱняумылымашышт вашталтеш. Кушко тудо шукта да могай кышам кода, повестьыште умылаш лиеш.