Подростко-влакым ончен кушташ поснак йӧсӧ. Молан тыгай нелылык лектеш? Тудын амалже могай? Тидын нерген Марий Элысе социально-педагогический, медицине да социальный полышым пуышо «Детство» рӱдерын социальный педагогшо Ольга Кузьминых умылтара.
Тиде жапыште подросткылан ик эн тӱҥ – кугыеҥ-влакын илышыш шке семын ушнаш, ача-ава ден иктӧр улмым шижаш. Но тыгодым нунылан кугыеҥ-влакын полышышт, пагалымышт да умылаш тыршымышт кӱлыт.
«Ынде кугу улам»
Тыгай ваш шогымаш – кугыеҥ дене иктӧр праван лияш, шке кӱлешлыкым умылтараш, ышташ шонымым илышыш шыҥдараш ик эн куштылго йӧн.
«Мый кӧ улам?»
Подростко шкенжым шке кычалеш, шке койышыжым умылаш тӧча. Тидым подросткын кризис идентичностьшо маныт.
«Тиде мыйын кумдыкем»
Чыла подростко шке кумдыкшым орола. Ача-авалан кушко пураш огеш лий, умылтара. Икшыве ача-аван шонымашыжым тоштылан, кӱлдымашлан шотла. Чекым ыштыме дене тудо ача-аван шылталымышт да илышыште лекше нелылык-влак деч аралалташ тырша.
«Шке шонымашем уло»
Тиде жапыште кеч-могай йодышлан тудлан ик шомакан вашмут гына кӱлеш. Йырже тӱням шем але ош тӱсаным гына ужеш. Тидыже иктаҥаш-влак да тыгак ача-ава дене тӱрлӧ вашумылыдымашым, ӱчашымашым луктеш.
Шкендан йочадам, тудын койышыжым, сай могыржым те веле паледа.
Удалан вуйым ида пу, сайжым гына ужаш тыршыза. Лекше кеч-могай задачым, нелылыкым пырля решатлыза!