Подросткым ешыш ончаш налаш чыла приёмный ача-ава ямде огыл. Йоча гыч самырык пагытыш куснымо жапыште икшыве шыде койышан лийын кертеш, шке семынже ышташ тырша, конфликтыш чӱчкыдын пура. Тыгай жапыште тудо Шкенжым кычалеш.
Подросткым ончаш налаш шонышо ача-авалан Марий Эл Республикысе психолого-педагогический, медицине да социальный полышым пуышо «Детство» рӱдерын педагог-психологшо Елена Леонидовна Крылова икмыняр ой-каҥашым пуа.
Подростко дене пырля илен кертмым але укем пален налаш манын, йочам гостевой режим почеш ончаш налман да Йошкар-Олаште приёмный ача-ава-влаклан школышто тунем лекман. Мӧҥгӧ кондымеке, йоча дене икымше вашлиймаш кузе эртымым эскерыман. Йоча кугыеҥ дене кутыра, тугеже адаптаций умбакыже сайын эртышаш.
Подростко дене мутланыме годым шотыш налман:
- Изи сеҥымашыжлан, поро шомакшылан, сай койышыжлан мокталтыман.
- Йочам вес икшыве дене ида таҥастаре.
- Подростко дене мутланыме годым условийым ида шынде, сай, идеальный койыш-шоктышым вигак ида йод. Вашталтышым эркын пуртыман. Йочан сай койышыжым муаш да вияҥден толаш кӱлеш. Йочалан ӱшаныман – тиде эн тӱҥ.
- Йочан койыш-шоктышыжым умылаш тыршыза, тудым тӱткын колыштса, вара гына иктешлымашым ыштыза.
- Йочалан эре сырен ида кошт.
- Те чын огыдал гын, тидым вигак ойлыза. Авторитетым йомдараш ида лӱд.
- Йочан шонымашыже дене келшымыдам чӱчкыдынрак ончыктыза.
- Шуко ида кутыро. Ласкан да пеҥгыдын ойлыза. Ӱчашаш огеш кӱл. Ӱчашымаш деч утлаш огеш лий гын, пӧлем гыч лектын кайыза. Тыге ыштен, мутланымашым мучашледа. А вара, лыпланымеке, уэш кутыраш тӱҥалаш лиеш.