Оршанке посёлкысо И.К.Глушков лӱмеш шуко профилян колледжын кокымшо курсышто тунемше Мария Рябинина «Межкультурный диалог народов России» Российысе научно-практический конференцийыш ушнен. Тусо «Кулинарный экскурс» номинацийыште ӱдыр кумшо вер дене палемдалтын. Тидлан Мария подкогыльым ыштыме нерген видеороликым ямдылен.
Cпортым да йоча-влакым йöратыше
Ӱдыр Оршанке район Кугу Ӧрша ялыште шочын-кушкын. Тысе школышто тунеммыж годымак чолга койышыж дене ойыртемалтын. Тыгак спорт дене пеҥгыде кылым кучен. Спортивный туризм дене утларак заниматлен. Российысе, республикысе, районысо таҥасымашлаште вийжым терген. 2020 ийыште спортын ты видыштыже ече дене дистанцийыште Марий Элын первенствыштыже икымше верым налын. Тылеч вара Мариялан спортивный туризмыште кокымшо разрядым пуэныт.
Индешымше класс деч вара тудо Оршанке посёлкысо колледжыш воспитательлан тунемаш пура.
– Йоча-влак дене пашам ышташ шоненам да колледжыш тунемаш пуренам. Колледжыште мыланем моткоч келша, адакшым ойырен налме профессиемат чонемлан лишыл. Кызыт тунеммылан утларак жапым ойырем, садлан спорт изишак шеҥгелан кодын. Туге гынат таҥасымашлаште вием тергем, – ойла М.Рябинина.
Кумыл уло гын, лектышат куандара
Тений мартыште Мариян туныктышыжо, видеоматериалым ямдылыме пашан шанче вуйлатышыже Марина Геннадьевна Москвичёва «Межкультурный диалог народов России» конференцийыште ӱдырлан таҥасен ончаш темлен. Конкурсын положенийжым шымлымеке, Мария тушко ушнаш кумылаҥын. Конкурс Мордовий Республикысе Ичалки олаште эртен. Ты конкурс нерген ӱдыр тыгерак каласкалыш:
– Ты конференцийысе таҥасымашлан шке калыкын кочкышыж нерген видеоматериалым ямдылаш кӱлын. Мый подкогыльым ыштыме нерген материалым вигак войзаш тӱҥалынам. Молан манаш гын мӧҥгыштӧ тудым чӱчкыдын ыштена. Материалым ямдылаш, войзаш, тудым редактироватлаш улыжат ныл кече лийын. Эн ончыч подкогыльо нерген материалым погышым, вара сценарийым келыштарышым. Эрлашыжым занятий-влак деч вара мӧҥгӧ кудальым, авам дене видеом войзымо пашалан пижна. Тудо операторын сомылжым шуктен. Йӱд марте тудын дене толашенна. Эрлашыжым видеом монтироватлаш шуко жап каен. Видеоматериалым тӱрыснек ямдылен шуктымеке, Марина Геннадьевналан ончыктенам. Тудлан келшен, мыйым мокталтенат ыле. Пашамым конкурсыш колтенна. Призовой верым налме нерген ушыштем нимогай шонымашат лийын огыл. Вет тушто элнан тӱрлӧ регионжо гыч тӱрлӧ национальностян еҥ-влак таҥасеныт. Апрель мучаште кумшо верым налмем нерген увертареныт. Мый ончычшо ӧрынамат ыле, но тидлан моткоч йывыртенам. Ӱшанем, ончыкыжымат илышыштем тыгай конкурс-влак лийыт. Вет нуно студент-влаклан вияҥашышт, шке вийыштлан ӱшанаш кумылым луктыт.
Чынжымак, кеч-могай конкурс самырык еҥлан ончыко ӱшанлын ошкылаш, шонымашке шуаш полша. А марий калыкын подкогыльыжо нерген видеороликым ямдылымышт эшеат куандара. Ты роликлан кӧра элыштына илыше вес национальностян самырык еҥ-влакат ынде мемнан кочкышна нерген утларак палаш тӱҥалыт.