Шуко пачеран пӧртыштӧ илена. Управляющий компаний подъездым эрыктышаш мо?
Шернур районын прокуратуржо умылтара:
– РФ Жилищный кодексын 162-шо статьяштыже палемдыме: шуко пачеран пӧртым кучымо договор почеш управляющий компаний кутырен келшыме жапыште оксала пашам шукта да услугым пуа, тидын шотыштак тыгай пӧртысӧ тӱшка погым шот дене кучымо да олмыктымо шотышто.
Тӱшка погышко пурат: тошкалтыш площадке, тошкалтыш, коридор, колясочный, технический пачаш да подвал.
РФ Правительствын 2013 ий 3 апрельыште лукмо 290-шо номеран пунчалыштыже шуко пачеран пӧртыштӧ тӱшка погым кучымо шотышто могай услугым пуымо да пашам шуктымо радамым возымо. Тиде переченьын 23-шо пунктшо почеш, тамбурым, холлым, коридорым, тошкалтыш площадкым эрыктышаш, мушшаш улыт.
Садлан подъездым эрыктымаш управляющий компанийын обязанностьшылан шотлалтеш, а тудлан тӱлымаш шуко пачеран пӧртым арун кучымылан тӱлымашке пурталтын.