Почкама

 

Почкама – курыкмарий-влакын сӧрастарыме насташт.

Туге гынат тудо моло вереат кучылталтын. Теве В.Васильев-Ӱпымарийын возымаштыже вашлийына: «Кум туатан шӱштӧ лаштыкеш (тӱрлаже шечат пелырак лийыт) тыгыде шийым 10-15 нергем ыштен пӱшкылыт, йыр тӱрлаште тыгыде шер лиеш, тудым почкама маныт. Почкамам, шарпан тӱреш пижыктен, оҥеш сакат».

«ХХ курымышто Курыкмарий районышто сӧрастарыме настам ыштыше еҥ-влак лийын огытыл. Ныл ий ончыч Йоласал тӱвыра да мастарлык пӧртым почмеке, почкамам кузе ышташ кӱлмым мыланна Альберт Фотеевич Смирнов ончыктен. Тиде чолга пӧръеҥ районын историйже нерген ятыр материалым, экспонатым, фотографийым чумырен. 87 ияш краевед эсогыл шкешотан тоштерым поген. Почкамалан ырший-влакым мастар-влак чеканитленыт. Кузе ышташыжым пален налмеке, мыланна материалым муаш кӱлын», – каласыш Йоласал тӱвыра да мастарлык пӧртым вуйлатыше Нина Тятюкова.

Почкамам курыкмарий-влак прямоугольник сынан шӱштышкӧ келыштареныт. Тушко колшӱм семын ший ырший-влакым ургеныт. Почкаман кӱшыл ужашышкыже покшеке ший дене ыштыме кум лукан ширкамам (тудым эше сюльгама маныт) пижыктеныт.  Тудын шеҥгелныже чуякарак име лийын, варажым тудым почкама име манаш тӱҥалыныт. Ширкамаште тазалыкым, сеҥымашым, пиалым тыланыме шот дене мифысе тӱрлӧ палым ончыкталтын. Почкаман тӱржым шер да бисер, а варажым ӱлыл тӱрым каури ракывот дене сӧрастареныт. Поянрак вате-влак эсогыл кок почкамам сакалтеныт, а йорлыракышт – иктым, тыгодым ыршийыштат шагалрак лийын. Ожно почкама тӱрлӧ зиян деч гына огыл, кредалмаште да сонарыш коштмо годым вашлиялтше тушман деч аралтышлан шотлалтын.

 

Эльвира Терентьева.