3 декабрьыште — Российыште Палыдыме салтакын кечыже. Тиде пайрем сарыште вуйжым пыштыше, увер деч посна йомшо, геройын кӧ улмыжым рашемден кертдеак тойымо еҥ-влакым шарнаш эртаралтеш.
Шарнена палыме герой-влакымат, шарнена сӧй пасуэш йомшо-влакымат.
Нигӧ да нимо ок мондалт… Тиде ойым пеҥгыдемден, Россий военно-исторический обществын Марий Элысе пӧлкажын еҥже-влак таче шарнымаш акцийым эртареныт. Республикысе РВИО-н вуйлатышыже Е.П.Кузьмин, Йошкар-Олан мэрже Е.В.Маслов калык дене пырля Мендур шӱгарлаште памятник тураште изирак митингым эртареныт, а вара ола рӱдыштӧ Курымашлык тул воктене пеледыш аршашым пыштеныт.
– Палыдыме салтак чылт палыдымыжак огыл. Тудо мемнан, шочмо мландын эргыже, геройжо. Ме южыштым огына пале гынат, патырлыкыштым, геройла вуйым пыштымыштым шарнена. Чаманен каласыман, тыгайже шагалын огыл лийыныт. Нунын лӱмыштым пӧртылташ -влак полшат, тау нунылан. А ме тыге шарнен, вуйнам савен, шке порысым шукташ тӱҥалына ончыкыжымат, — каласен Е.П.Кузьмин.
РВИО-н акцийышке Марий калык конгресс да моло мер ушемын еҥже-влак ушненыт.
