Писте чай нервым лыпландара, кылмен черланымым эмла, кугу температурым волта. Тидлан 250 мл шокшо вӱдыш ик кугу совла писте пеледышым пыштыман, петырыман да пел шагат вучалтыман. Вара шӱрыман да йӱман. Чайыш мӱйым изишак ешараш лиеш.
Писте пеледыш ӱдыра-маш-влаклан менопаузо годым пайдале. Тыгай годым ӱдырамашын вуй да йыжыҥ корштат, кумыл чӱчкыдын вашталтеш, пӱжалтара. Ты состоянийым куштылемдаш манын, кастене ик стакан шокшо вӱдыш кок кугу совла писте пеледышым пыштыман, атым солык дене леведман. Эрдене кочмо деч ончыч лемым изиш ырыктен йӱман. Тыге 15-30 кече ыштыман. Вара каналтыман. Тыге идалыкыште кок-кум гана ыштыман. Тылеч посна писте пеледышан лем давленийым нормыш конда, пагарын да шолын пашаштым саемда.
А менструальный циклым нормыш кондаш да тудо корштыде эртыже манын, писте пеледыш чайым ик стакан дене арня мучко йӱман.
Пӧръеҥ-влакланат писте пеледыш простатит годым пайдале. Тидлан 200 г коштымо пеледышым ик литран янда банкыш пыштыман, ӱмбакыже шокшо вӱдым темыман да 150 г мӱйым ешарыман. Сайын лугалтыман, петырыман да юалге верыш кораҥдыман. Кум кече гыч тушко 200 мл спиртым але ош аракам ешарыман да эше ик арня шинчыктыман. Настойкым ик кугу совла дене кечеш кок гана кочмо деч ончыч йӱман.