3 мартыште Писательын тӱнямбал кечыже палемдалтеш.
Писатель-влак шотышто лудшына-шамыч деч йодыштмашым эртарышна. Йӧратыме писательда уло мо? Могай произведенийже утларак келша? Молан?
Виталий Кудрявцев, Оршанке район:
– Мыланем Майоров-Шкетан лишыл. Тудын возымо да чапланыше «Эреҥер» романысе действий Оршанке район Тошто Крешын ялыште кызыт илыме пӧртыштем эрта. Тышке чӱчкыдынак турист-влак толыт. Нунылан 1920-шо ийласе илышым радамлем, роман нергенат ушештарем.
Шкетан мыскарамат возен. Мыят мыскараче кумылан улам, сценкым шонен луктеденам да возенам. Эсогыл нунын дене сценышке лектынам, калык ончылно выступатленам.