3 мартыште Писательын тӱнямбал кечыже палемдалтеш.
Писатель-влак шотышто лудшына-шамыч деч йодыштмашым эртарышна. Йӧратыме писательда уло мо? Могай произведенийже утларак келша? Молан?
Надежда Гусева, Йошкар-Ола:
– Литератор улам, сандене ойырен каласаш йӧсӧ. Чыла марий произведений сылнак. Утларакшым 1960-1985-ше ийлаште возышо писатель-влакын духовно-нравственный тематике дене кылдалтше произведений-шамыч виян улыт.
Школ годсекак чонышкем пижын Вениамин Ивановын «Вӱдшӧ келге, серже тура» повестьше. Ӱмаште тудым тичмашнек угыч лудын лектым. Ты повесть илышын шере-кочыжым шижаш, умылаш таратыше, самырык тукымым куштымаште сай полыш, шонем.
Александр Юзыкайнын «Маска вынем» ден «Кугызан вуй» романже-влак келшат. Тунемшылан программым ямдылымаште тыршем. Тышеч Никандр Ильяковын «Латик кролик» ойлымашыжым лудаш темлем. Пеш виян, чоным савырыше, чылалан туныктышо произведений, писательын йылмыжат поян.
Варарак возышо сылнымутчо-влак кокла гыч Мария Илибаевам палемдем. Тудын чыла книгаже книга шӧрлыкыштем уло. Произведенийжылан шымлымашымат возенам ыле. Тыгак Маргарита Ушакован произведенийлаже келшат.