3 мартыште Писательын тӱнямбал кечыже палемдалтеш.
Писатель-влак шотышто лудшына-шамыч деч йодыштмашым эртарышна. Йӧратыме писательда уло мо? Могай произведенийже утларак келша? Молан?
Алевтина Давлетшина, Свердловск область:
– Мылам Чавайнын «Ото» почеламутшо келша. Тушто марий калыкын тошто йӱлажым жаплаш кӱлеш манмыже келшен толеш.
Йыван Кырлан «Шочмо кече», «Муро» почеламутшо-влак сылне улыт. Изинек ушышко шыҥдаралтыныт.
Макс Майнын «Ануш» пьесыже лишыл. Тушто Кугу Отечественный сарыште лӱддымӧ героине нерген ойлалтеш. Медпашаеҥ улам да сандене, очыни, Ануш Атлашкинан геройлыкшо верч утыр куаненам да пьесым вургыжын лудынам.