3 мартыште Писательын тӱнямбал кечыже палемдалтеш.
Писатель-влак шотышто лудшына-шамыч деч йодыштмашым эртарышна. Йӧратыме писательда уло мо? Могай произведенийже утларак келша? Молан?
Любовь Сергеева, Волжский район:
– Чыла писательын илыш шӧрыным шке семынже ужын почын пуымыжо шерге. Кажныже писательын перож йымач шыжалтшаш теме, шке чоншижмашыж гоч почын ончыктат. Илышыже вет кашташ лупшал сакалтыме тувыр огыл. Муро семын «кӱзыман да волыман» але шуҥгалтышан.
Туныктышо семын шкемымат, йочамат ондален ом керт: «тидыже пеш чаплын воза», «а тидын серымыжым лудмо ок шу» манаш йылме ок савырне. Мылам пырля тунемме йолташ-шамыч лишыл улыт: Вячеслав Абукаев, Юра Байгузин, Геннадий Сабанцев, Юра Исаков. Нунын пагытлан келшышын шке усталыкышт. Классик-шамычлан вуйнам савена. Йоча-шамыч дене пьесышт почеш спектакльым шындаш йӧратем.