Кундемыштына самырык предприниматель ятыр. Нунын кокла гыч иктыже – Шернур посёлкышто ветеринарный клиникым, зоокевытым да озадыме пий ден пырыс-влаклан приютым почшо самырык ӱдырамаш Надежда Светлакова.
Шонымаш шукталтын
Шернур посёлкышто шочын-кушшо Надежда йоча жапше годсек ветеринарный врач лияш шонен. Эсогыл тидын нерген тудо посна кагазеш возен да шылтен пыштен. Кушкын шумеке, Озаҥ оласе ветеринарный академийыште ветеринарный врачлан тунем лектын. Кызыт тудым шке районыштыжо веле огыл, пошкудо районла гыч полышым йодын толшо-влак пагалат да аклат.
Надежда ты куштылго огыл пашам кум ий виктара. 2018 ийыште эн ончыч мӧҥгыж пелен ветеринарный кабинетым, варажым посёлкысо ужалыме рӱдерыште зоокевытым почын.
«Ик жап Озаҥыште ыштенам, опытан ветеринарный врач-влак дене тунемынам.
Ветеринарный клиникышке Шернур, Параньга, Марий Турек районла гыч еҥ-влак тӱрлӧ полышым йодын толыт. Пийым, пырысым, черепахым кондат. Южыжо моткоч начар тазалыкан улыт. Тӱҥ шотышто стерилизацийым ыштем, прививкым шындем, чипироватлем, тӱредам, шуршо деч эмлем. Йодмо почеш ялышкат лектын коштам. Чылажымат шкет ыштем.
А кевытыште тӱрлӧ кочкышым, шуршо, пудий да чер ваштареш эм-влакым ужалена. попугай ден кол-влак лийыныт. Жап укелан кӧра кевытым петыренам», – ойла тудо.
Надеждан Йошкар-Олаште верланыше «Мой бизнес» рӱдер дене кылже пеҥгыде. Кодшо ийын ты рӱдерысе амалкалче-влаклан эртарыме «Молодые предприниматели России» республикысе конкурсын этапыштыже икымше верым налын. Надежда ончыкыжымат тыгай шотан конкурсышто шкем тергаш шона.
Озадыме пий ден пырысым кучат
Надеждан кызыт ик эн тӱҥ пашаже – уремлаште перныл коштшо пий, пырыс-влакым кучаш да тергаш. Нуным Йошкар-Олаште, Волжскышто, Волжский, Шернур, Параньга районлаште пога.
«2018 ийыште Шернур районысо администраций тыгай приютым почаш темлен. Идалык эртымеке, Шернур да Волжский районлаште озадыме пырыс ден пийым икымше гана кучаш тӱҥалме. Тыге приют шочо. Тидлан посёлкышто посна пӧртым кучем. Но тений кок пачашан оралтым налынам, кызыт тушто ачалыме паша ышталтеш. Тыге ик верыште ветеринар клинике, зоокевыт да приют лийыт. Нормо почеш тушто чылажат келшен толеш, вӱд, газ улыт. Тораште огыл 25 сотко яра мландым налме.
Шуко пийым кучена. Нунылан стерилизацийым ыштем, вакцинироватлем. Тыгай пий, пырыс-влаклан чыла процедурым ышташ кугыжаныш оксам ойыра. Тыге сайжым, тазам эрыкыш колтена, шоҥго, осал пий-влакым приютышко кодена. Тӱҥ шотышто эрыкыш шагалжым колтена.
Приютышто шукталт толмо пашана нерген ВК соцкылыште «Докторвет Сернур приют для бездомных животных» группышко вераҥдена», – ойла тудо.
Надежда ончыкыжымат ты пашам чолган шукташ манын, УЗИ, рентген да моло оборудованийым налаш шона. Ик ситыдымаш: полышкалыше уке. Тидыже нелылыкым луктеш. Надеждан мутшо почеш, кызыт ӱдыр-рвезе-влак ветеринар профессийым шуэн ойырат. Туге гынат 30 ияш самырык ӱдырамаш тӱҥалме пашажым вораҥдарен толеш, шонымашыжат шуко.