11 ноябрьыште «ГосСтарт.Доброслужащий» проект почеш Марий Эл Республикысе Пӱртӱс поянлык, экологий да йырвелым аралыме шотышто министерствын пашаеҥже-влак министр дене пырля суртдымо пий да пырыс-влаклан ыштыме «Маленькие друзья с большим сердцем» Йошкар-Оласе приютыш миен коштыныт.
Тыште пий ден пырыс-влак шке озаштым вучен илат. Министерствын, Рӱдӧ да кечывалвел район-влак кокласе чодыра управленийын, Авиалесоохранын, «Таволга» чодыра озанлык предприятийын пашаеҥышт приютлан оксам, икмыняр мешак тошто вургемым пуэныт.