Ӱдырем ешыж дене олаште ила. Ксюша уныкам изиж годым ачаж ден аваж деч пийым йодын. Уныкам школыш каен да пинегым мылам конден.
– Ба, тиде тыланет пӧлек – Рексик, – воштыл колтыш Оксинушкам.
А мом ыштет? Ончет. Тудо вет ялысе пий гай уремыште илен ок керт. Пӧртыштак ашнем ынде.
Пошкудо Клави кока эреак уналыкеш пура ыле. Чайым але кофем пырля подылын шинчаш, чоным почын кутыраш йӧратен. Пий тудын йолжо воктен эре пызнен киен.
Икана йӱдым Рекс пӧрт гыч писын гына кудал лекте. Клави кокан пӧрт ончыкшо пурен шинче да пеш чот йыҥысаш тӱҥале. Клавин пырысше адак окна ончылно шинча мо, шоналтышым. Вуйжым сакен, мый декемак тольо да йол йымак пурен возо.
Ялыште паша шуко. Вес кечын пакчаштак эртарышым. Кастене веле Клави кокам ушышкем пурыш. Чайымат йӱаш ок тол. Шке миен савырнем манын шоналтышым. Капка ончылныжо кугу шем машина шога. Эрге-шешкыже толыныт улмаш.
– Авам таче йӱдым вес тӱняшке каен колтыш, – лекте да каласыш Вачи.
Э-э-эй, Рекс пием тудын колымыжым шижын улмаш, шоналтышым.
ГАЛИНА Т.
Шернур район.