Ӱшанле улмыжлан кӧра пий еҥын эн сай йолташышкыже савырнен. Лудшына-влак тидын шотышто мом каласат?
Юлия Исакова, Йошкар-Ола:
– 2016 ийыште миттельшнауцер урлык пийым ешышкына налынна. Бакс «кияш», «шинчаш», «кушташ», «мераҥ», «банзай» (шеҥгел йолыш шогалеш), «переворот» команде-шамычым пала. Командым шуктымылан мый тудым тамле кочкыш дене сийлем. Икана пел ияш улмыж годым ме Баксым пасуш луктынна. Тушто ош кугу овчарке кудалыштын. Тудо, очыни, осал лийын, мемнан ӱмбак кержалтнеже ыле. Но Бакс тидым шижын, мучышталтын да овчарке ваштареш шогалын. Тыге тунам тудо мемнам утарен. Кызытат пием ешемым орола да арала.